کرم سیکٹر میں فتنۃ الخوارج کی دراندازی کی کوشش پاک فوج نے ناکام بنا دی، طالبان پوسٹیں چھوڑ کر فرار

کرم: سیکیورٹی ذرائع کے مطابق کرم سیکٹر میں افغان طالبان کی زیر نگرانی فتنۃ الخوارج کی دراندازی کی کوشش ناکام بنا دی گئی۔ افغانستان کے صوبوں ننگرہار اور پکتیا میں موجود مبینہ افغان طالبان پوسٹوں سے دراندازی کی کوشش کی گئی، جسے سرحد پر موجود پاکستانی سیکیورٹی فورسز نے مؤثر کارروائی کرکے ناکام بنا دیا۔

ذرائع کے مطابق افغان طالبان نے پاکستانی سرحدی چوکیوں پر بھاری ہتھیاروں اور مارٹرز سے فائرنگ کی، جس پر پاکستانی سیکیورٹی فورسز نے فوری جوابی کارروائی کی۔

جوابی کارروائی کے دوران افغان طالبان کی متعدد سرحدی پوسٹوں، مارٹر پوزیشنز اور دفاعی ٹھکانوں کو نشانہ بنایا گیا۔ ذرائع کا کہنا ہے کہ شدید جوابی کارروائی کے بعد افغان طالبان متعدد پوسٹیں چھوڑ کر فرار ہوگئے۔

سیکیورٹی ذرائع کے مطابق سرحدی صورتحال پر مسلسل نظر رکھی جا رہی ہے اور فورسز کسی بھی ممکنہ اشتعال انگیزی کا جواب دینے کے لیے مکمل طور پر الرٹ ہیں۔