پاکستان اور یورپی یونین کے درمیان 6 کروڑ 50 لاکھ یورو کے معاہدوں پر دستخط

اسلام آباد: پاکستان اور یورپی یونین کے درمیان 6 کروڑ 50 لاکھ یورو کے معاہدوں پر دستخط ہوگئے، جن کے تحت ملک میں تین اہم ترقیاتی پروگرام شروع کیے جائیں گے۔

وزارت اقتصادی امور کے مطابق معاہدوں پر سیکرٹری اقتصادی امور محمد حمیر کریم اور یورپی یونین کے سفیر ریمونڈاس کروبلیس نے دستخط کیے۔ ان پروگراموں کا مقصد سرمایہ کاری کے فروغ، قانون کی حکمرانی اور کاروباری ماحول میں بہتری لانا ہے۔

حکام کے مطابق مالی معاونت سے توانائی اور ماحولیاتی استحکام کے منصوبوں کو بھی آگے بڑھایا جائے گا، جبکہ گلوبل گیٹ وے پروگرام کے ذریعے پاکستان میں غیرملکی سرمایہ کاری کے لیے مواقع پیدا کیے جائیں گے۔

منصوبوں کے تحت ٹیکس نظام اور طویل مدتی مالیاتی منصوبہ بندی کو بہتر بنانے پر بھی کام ہوگا۔ خیبرپختونخوا کے آف گرڈ دیہی علاقوں میں قابل تجدید توانائی کو فروغ دینے کے ساتھ صوبے کے توانائی شعبے میں نجی سرمایہ کاری اور شراکت داری بڑھانے کے اقدامات کیے جائیں گے۔

وزارت اقتصادی امور کے مطابق خیبرپختونخوا اور بلوچستان میں شہریوں کی انصاف تک رسائی بہتر بنانے کے لیے اقدامات کیے جائیں گے، جبکہ پنجاب اور سندھ میں متبادل اور تجارتی تنازعات کے حل کے نظام کو مزید مضبوط کیا جائے گا۔

سیکرٹری اقتصادی امور محمد حمیر کریم نے کہا کہ یورپی یونین کی معاونت پاکستان میں غیرملکی سرمایہ کاری بڑھانے کے قومی ہدف سے ہم آہنگ ہے۔ ان کے مطابق پروگراموں سے دیہی علاقوں میں بجلی کی فراہمی اور تجارتی تنازعات کے حل کے نظام میں بہتری آئے گی۔

یورپی یونین کے سفیر ریمونڈاس کروبلیس نے کہا کہ معاہدے پاکستان کی اقتصادی ترقی اور سرمایہ کاری کے فروغ کے لیے یورپی یونین کے تعاون کے عزم کا اظہار ہیں۔