تربت:تربت پریس کلب کی دو سالہ نئی کابینہ بلامقابلہ منتخب، حافظ صلاح الدین سلفی صدر اور ماجد صمد جنرل سیکرٹری منتخب

تربت۔ تربت پریس کلب کی دو سالہ نئی کابینہ کے انتخابات کا عمل مکمل ہوگیا، جس کے نتیجے میں تمام عہدیداران بلامقابلہ منتخب ہوگئے۔ نومنتخب کابینہ میں حافظ صلاح الدین سلفی صدر، نور شاہ نور نائب صدر، ماجد صمد جنرل سیکرٹری، ایاز اسلم ڈپٹی جنرل سیکرٹری جبکہ مقبول ناصر فنانس سیکرٹری بلا مقابلہ منتخب ہوئے۔
انتخابی عمل تین رکنی الیکشن کمیٹی کی نگرانی میں مکمل کیا گیا، جس میں چیئرمین الیکشن کمیٹی رستم جان گچکی ایڈووکیٹ ، ممبران الیکشن کمیٹی نثار آدم جوسکی اور پھلان خان تھے۔ الیکشن کمیٹی کے رکن نثار آدم جوسکی نے تربت پریس کلب کے آڈیٹوریم میں تمام عہدیداران کے بلامقابلہ منتخب ہونے کا باضابطہ اعلان کیا۔
قبل ازیں تربت پریس کلب کی سابق کابینہ کی دو سالہ مدت مکمل ہونے کے بعد 9 ستمبر کو جنرل کونسل کا اجلاس منعقد ہوا، جس میں سابق کابینہ کو تحلیل کرتے ہوئے پریس کلب کے روزمرہ معاملات، انتظامی امور اور دیگر ضروری ذمہ داریوں کی انجام دہی کے لیے تین رکنی انتظامی کمیٹی تشکیل دی گئی تھی۔
جنرل کونسل کے فیصلے کے مطابق پھلان خان کو انتظامی کمیٹی کا سربراہ جبکہ ماجد صمد اور طارق مسعود کو کمیٹی کے ارکان مقرر کیا گیا تھا۔ تین رکنی انتظامی کمیٹی نے نئی کابینہ کے انتخاب تک تربت پریس کلب کے انتظامی و روزمرہ امور کی ذمہ داریاں انجام دیں۔
نئی کابینہ کے بلامقابلہ انتخاب کے ساتھ ہی تربت پریس کلب کے انتظامی امور کا دو سالہ نیا دور شروع ہوگیا ہے۔ نومنتخب عہدیداران نے اپنی ذمہ داریاں سنبھال لی ہیں اور اس عزم کا اظہار کیا ہے کہ پریس کلب کے امور کو مزید منظم، فعال اور بہتر انداز میں چلانے، صحافتی سرگرمیوں کے تسلسل کو برقرار رکھنے اور صحافی برادری کے مسائل کے حل کے لیے بھرپور کردار ادا کیا جائے گا۔