نوجوانوں کے روشن مستقبل کی جانب ایک خوبصورت قدم، لسبیلہ میں کیریئر کاؤنسلنگ سیمینار

نوجوانوں کے روشن مستقبل کی جانب ایک خوبصورت قدم، لسبیلہ میں کیریئر کاؤنسلنگ سیمینار
تحریر،ایم اسلم گدور

ضلعی انتظامیہ لسبیلہ کے زیراہتمام ڈپٹی کمشنر لسبیلہ محترمہ حمیرہ بلوچ صاحبہ کی بصیرت افروز قیادت میں گزشتہ روز بمورخہ 10 ستمبر 2026 بروز جمعرات نوجوانوں کے روشن اور تابناک مستقبل کے سلسلے میں ایک نہایت اہم، معلوماتی اور فکر انگیز کیریئر کاؤنسلنگ سیمینار لسبیلہ یونیورسٹی کے ایجوکیشن ڈیپارٹمنٹ کے ہال میں منعقد ہوا۔ سیمینار کا بنیادی مقصد طلباء و طالبات کو ان کے تعلیمی سفر، مستقبل کے کیریئر کے انتخاب، مسابقتی امتحانات، سرکاری و انتظامی شعبوں میں مواقع اور عملی زندگی میں کامیابی کے لیے درست سمت اور رہنمائی فراہم کرنا تھا۔ یہ امر یقیناً قابلِ ستائش ہے کہ ضلعی انتظامیہ نے نوجوان نسل کو محض رسمی طور پر نہیں بلکہ ان کے مستقبل کی حقیقی ضرورت کو محسوس کرتے ہوئے اس نوعیت کا علمی و فکری پروگرام منعقد کیا۔
سیمینار میں انتظامی شعبے سے تعلق رکھنے والی باصلاحیت اور تجربہ کار خواتین افسران، بالخصوص کمشنر لسبیلہ ڈویژن محترمہ سائرہ عطا صاحبہ اور اسسٹنٹ کمشنر کنراج محترمہ کشش چوہدری صاحبہ نے خصوصی شرکت کی اور طلباء و طالبات کو نہایت مؤثر، مدلل اور عملی انداز میں کیریئر کاؤنسلنگ کے حوالے سے آگاہی فراہم کی۔
کمشنر لسبیلہ ڈویژن محترمہ سائرہ عطا صاحبہ نے اپنے خطاب میں نوجوانوں کو مخاطب کرتے ہوئے کہا کہ زندگی میں کامیابی کے لیے سب سے پہلے اپنے مقصد کا تعین کرنا اور پھر اس مقصد کے حصول کے لیے مسلسل محنت، مستقل مزاجی اور خود اعتمادی کے ساتھ آگے بڑھنا ضروری ہے۔ انہوں نے کہا کہ آج کے نوجوانوں کے پاس ماضی کی نسبت بے شمار مواقع موجود ہیں، ضرورت صرف اس امر کی ہے کہ وہ اپنی صلاحیتوں کو پہچانیں، اپنی دلچسپی اور قابلیت کے مطابق شعبے کا انتخاب کریں اور وقت کی قدر کرتے ہوئے اپنی تعلیم و تربیت پر بھرپور توجہ دیں۔ محترمہ سائرہ عطا صاحبہ نے اپنے ذاتی تعلیمی اور پروفیشنل سفر کا حوالہ دیتے ہوئے طلباء و طالبات کو بتایا کہ کامیابی کا سفر ہمیشہ آسان نہیں ہوتا، راستے میں مشکلات، ناکامیاں اور مختلف چیلنجز ضرور آتے ہیں، لیکن جو شخص اپنے مقصد پر یقین رکھتے ہوئے محنت جاری رکھتا ہے وہ بالآخر اپنی منزل حاصل کرلیتا ہے۔ انہوں نے خصوصی طور پر طالبات کی حوصلہ افزائی کرتے ہوئے کہا کہ خواتین کسی بھی شعبے میں مردوں سے کم صلاحیت نہیں رکھتیں، انہیں صرف اپنے اندر موجود صلاحیت کو پہچاننے، اعتماد کے ساتھ آگے بڑھنے اور مواقع سے بھرپور فائدہ اٹھانے کی ضرورت ہے۔ انہوں نے نوجوانوں پر زور دیا کہ وہ صرف سرکاری ملازمت کو کامیابی کا واحد راستہ نہ سمجھیں بلکہ تعلیم، تحقیق، کاروبار، ٹیکنالوجی، سماجی خدمت اور دیگر شعبوں میں موجود مواقع سے بھی استفادہ کریں۔ ان کا کہنا تھا کہ ایک باشعور، باصلاحیت اور باہمت نوجوان ہی مستقبل کے مضبوط اور ترقی یافتہ معاشرے کی بنیاد رکھ سکتا ہے، اس لیے آج کی محنت ہی کل کی کامیابی کی ضمانت بن سکتی ہے۔
محترمہ سائرہ عطا صاحبہ اور محترمہ کشش چوہدری صاحبہ نے اپنے اپنے تعلیمی پس منظر، پیشہ ورانہ سفر، جدوجہد، تجربات اور کامیابیوں کا ذکر کرتے ہوئے نوجوانوں کو یہ پیغام دیا کہ کامیابی کسی شارٹ کٹ کا نام نہیں بلکہ واضح مقصد، مسلسل محنت، خود اعتمادی، درست فیصلوں اور اپنے شعبے سے مخلصانہ وابستگی کا نتیجہ ہے۔ ان کے ذاتی تعلیمی و پروفیشنل سفر نے شرکاء کے لیے یقیناً ایک عملی مثال کی حیثیت اختیار کی اور طلباء و طالبات نے ان کی گفتگو کو نہایت توجہ اور دلچسپی سے سنا۔ خصوصاً خواتین افسران کا اپنے تجربات نوجوان نسل کے ساتھ شیئر کرنا طالبات کے لیے حوصلہ افزائی اور اس امر کا خوبصورت پیغام تھا کہ صلاحیت، محنت اور عزم کے ساتھ خواتین بھی انتظامی و پیشہ ورانہ میدان میں نمایاں مقام حاصل کرسکتی ہیں۔
اسسٹنٹ کمشنر کنراج محترمہ کشش چوہدری صاحبہ نے اپنے خطاب میں طلباء و طالبات کو کیریئر کے انتخاب کے حوالے سے نہایت مفید اور عملی نکات سے آگاہ کرتے ہوئے کہا کہ ہر طالب علم کو سب سے پہلے یہ سمجھنے کی ضرورت ہے کہ وہ کس شعبے میں بہتر کارکردگی دکھا سکتا ہے، کیونکہ محض دوسروں کی دیکھا دیکھی کسی شعبے کا انتخاب مستقبل میں مشکلات کا باعث بن سکتا ہے۔ انہوں نے کہا کہ کیریئر کا فیصلہ ایک اہم مرحلہ ہے جس میں اپنی تعلیمی قابلیت، ذاتی دلچسپی، رجحان اور مستقبل میں دستیاب مواقع کو سامنے رکھنا چاہیے۔ انہوں نے طلباء کو مشورہ دیا کہ وہ مختلف شعبہ جات کے بارے میں معلومات حاصل کریں، اپنے سینئرز اور متعلقہ ماہرین سے رہنمائی لیں اور کسی بھی امتحان یا ملازمت کی تیاری شروع کرنے سے قبل اس کے تقاضوں اور طریقۂ کار کو اچھی طرح سمجھیں۔ محترمہ کشش چوہدری صاحبہ نے اپنے تعلیمی و پیشہ ورانہ سفر کی مثال دیتے ہوئے بتایا کہ عملی زندگی میں آگے بڑھنے کے لیے صرف کتابی علم کافی نہیں ہوتا بلکہ شخصیت سازی، ابلاغی صلاحیت، فیصلہ سازی، وقت کی منصوبہ بندی اور حالات کے مطابق خود کو بہتر بنانے کی صلاحیت بھی انتہائی اہمیت رکھتی ہے۔ انہوں نے طلباء و طالبات کو تلقین کی کہ وہ اپنے یونیورسٹی کے دور کو صرف ڈگری حاصل کرنے تک محدود نہ رکھیں بلکہ اس عرصے میں اپنی صلاحیتوں کو نکھاریں، نئی مہارتیں سیکھیں اور اپنے مستقبل کے لیے واضح راستہ متعین کریں۔ ان کا کہنا تھا کہ درست کیریئر کا انتخاب وہ بنیاد ہے جس پر ایک کامیاب پیشہ ورانہ زندگی کی عمارت تعمیر ہوتی ہے، اس لیے نوجوان کسی فیصلے میں جلد بازی کے بجائے معلومات، مشاورت اور اپنی صلاحیتوں کے حقیقی جائزے کو ترجیح دیں۔
بعدازاں ڈپٹی کمشنر لسبیلہ محترمہ حمیرہ بلوچ صاحبہ نے بھی سیمینار سے خطاب کیا۔ اپنے خطاب میں انہوں نے نوجوانوں کو مخاطب کرتے ہوئے کہا کہ آج کے دور میں صرف ڈگری حاصل کرنا کافی نہیں بلکہ نوجوانوں کے لیے ضروری ہے کہ وہ اپنی دلچسپی، صلاحیت اور رجحان کو سمجھتے ہوئے اپنے مستقبل کے شعبے کا انتخاب کریں۔ انہوں نے اس بات پر زور دیا کہ نوجوان اپنی صلاحیتوں پر اعتماد رکھیں، اپنے مقاصد متعین کریں اور کامیابی کے حصول کے لیے مستقل مزاجی کے ساتھ محنت کریں۔ ان کا کہنا تھا کہ نوجوان کسی بھی معاشرے کا سب سے قیمتی سرمایہ ہوتے ہیں اور اگر انہیں بروقت درست رہنمائی، مواقع اور حوصلہ افزائی فراہم کی جائے تو یہی نوجوان مستقبل میں نہ صرف اپنے خاندان بلکہ پورے علاقے اور ملک کی ترقی میں مؤثر کردار ادا کرسکتے ہیں۔ ڈپٹی کمشنر صاحبہ کی جانب سے نوجوانوں کے لیے اس نوعیت کے علمی و تربیتی پروگرامز کے انعقاد کا عزم یقیناً ایک مثبت اور قابلِ تحسین سوچ کی عکاسی کرتا ہے۔
اس کے بعد سیمینار میں “سوال و جواب” کا خصوصی سیشن شروع ہوا، جس میں طلباء و طالبات نے اپنے مختلف تعلیمی شعبہ جات، مستقبل کے کیریئر، مقابلے کے امتحانات، انتظامی شعبے میں آنے کے طریقہ کار اور عملی زندگی سے متعلق مختلف سوالات کیے۔ محترمہ سائرہ عطا صاحبہ اور محترمہ کشش چوہدری صاحبہ نے طلباء و طالبات کے سوالات کو نہایت تحمل، خلوص اور پیشہ ورانہ انداز میں سنا اور اپنے تجربات کی روشنی میں ان کے تسلی بخش اور مفید جوابات دیے۔ اس سیشن کی خاص بات یہ تھی کہ طلباء کو براہِ راست تجربہ رکھنے والی افسران سے سوالات کرنے اور اپنے ذہن میں موجود ابہام دور کرنے کا موقع ملا، جس سے سیمینار کی افادیت مزید بڑھ گئی۔
آخر میں طلباء و طالبات نے ضلعی انتظامیہ لسبیلہ سے گزارش کی کہ نوجوانوں کی رہنمائی اور مستقبل کی بہتر منصوبہ بندی کے لیے اس طرح کے معلوماتی، علمی اور تربیتی پروگرامز صرف ایک مرتبہ تک محدود نہ رکھے جائیں بلکہ ہر ماہ باقاعدگی کے ساتھ منعقد کیے جائیں۔ ڈپٹی کمشنر لسبیلہ محترمہ حمیرہ بلوچ صاحبہ نے طلباء و طالبات کی اس مثبت تجویز کو خوش آئند قرار دیتے ہوئے آئندہ بھی ایسے پروگرامز کے انعقاد کے حوالے سے مثبت انداز میں یقین دہانی کرائی۔
بلاشبہ نوجوانوں کے مستقبل کے حوالے سے منعقد ہونے والا یہ سیمینار محض ایک تقریب نہیں بلکہ نوجوان نسل کو درست سمت دکھانے کی ایک سنجیدہ اور مثبت کوشش تھی۔ آج جب ہمارے بہت سے نوجوان اپنی تعلیمی قابلیت کے باوجود کیریئر کے انتخاب اور عملی زندگی کے راستے کے حوالے سے تذبذب کا شکار نظر آتے ہیں، ایسے میں ضلعی انتظامیہ کی جانب سے کیریئر کاؤنسلنگ جیسے پروگرامز کا انعقاد وقت کی اہم ضرورت ہے۔ اگر اس سلسلے کو مستقل بنیادوں پر جاری رکھا جائے اور مختلف شعبوں کے ماہرین، کامیاب پروفیشنلز، سول افسران اور تعلیمی ماہرین کو نوجوانوں کے ساتھ مکالمے کا موقع فراہم کیا جائے تو اس کے دور رس اور مثبت نتائج برآمد ہوسکتے ہیں۔
آخر میں لسبیلہ یونیورسٹی کے طلباء و طالبات نے ضلعی انتظامیہ، ڈپٹی کمشنر لسبیلہ محترمہ حمیرہ بلوچ صاحبہ، کمشنر لسبیلہ ڈویژن محترمہ سائرہ عطا صاحبہ، اسسٹنٹ کمشنر کنراج محترمہ کشش چوہدری صاحبہ اور سیمینار کے منتظمین کا تہہ دل سے شکریہ ادا کیا کہ انہوں نے نوجوانوں کی ضرورت کو محسوس کرتے ہوئے ایک نہایت معلوماتی، علمی اور حوصلہ افزا نشست کا اہتمام کیا۔ ایسے اقدامات یقیناً نوجوانوں میں شعور، خود اعتمادی اور مستقبل کے حوالے سے مثبت سوچ پیدا کرنے میں اہم کردار ادا کرتے ہیں اور امید ہے کہ لسبیلہ میں نوجوانوں کی رہنمائی اور ان کے روشن مستقبل کے لیے یہ سلسلہ مزید وسعت کے ساتھ جاری رہے گا۔