نصف صدی بعد خاتون کو وراثتی جائیداد کیس میں ریلیف مل گیا

اسلام آباد: سپریم کورٹ نے ڈیرہ اسماعیل خان کی زیتون بی بی کو وراثتی جائیداد کے مقدمے میں تقریباً نصف صدی بعد حتمی ریلیف دے دیا۔

جسٹس منیب اختر، جسٹس ملک شہزاد اور جسٹس صلاح الدین پنہور پر مشتمل بینچ نے کیس کا فیصلہ سنایا، جسے جسٹس صلاح الدین پنہور نے تحریر کیا۔

عدالت نے 2022 کے فیصلے پر عملدرآمد کا حکم دیتے ہوئے نظرثانی خارج ہونے کا فیصلہ واپس لینے کی مخالف فریق کی درخواست بھی مسترد کردی اور عدالتی احکامات پر عملدرآمد نہ ہونے پر سخت برہمی کا اظہار کیا۔

سپریم کورٹ نے قرار دیا کہ عدالتی نظام کی بنیاد یقین، نظم و ضبط اور عدالتی احکامات کی حرمت پر قائم ہے، اس لیے عدالتی احکامات کی پابندی ہر صورت لازم ہے۔ عدالت نے کہا کہ عدالتی رعایت کو محض رسمی کارروائی سمجھنا افسوسناک ہے۔

فیصلے کے مطابق نظرثانی کیس میں 4 مارچ 2024 کو مشروط التوا دیا گیا تھا، تاہم 12 ستمبر کو ہونے والی اگلی سماعت پر دوبارہ التوا کی درخواست کی گئی۔ عدم پیروی کے باعث نظرثانی درخواست خارج کردی گئی تھی۔

مقدمے کے مطابق زیتون بی بی کے والد کا انتقال 1976 میں ہوا تھا اور انہیں اس وقت سے وراثتی جائیداد سے محروم رکھا گیا۔ سپریم کورٹ نے 2022 کے فیصلے پر عملدرآمد کا حکم دیتے ہوئے مخالف فریق کی درخواست مسترد کردی۔