لاہور : پی ٹی آئی کے سینئر رہنما اور سابق رکن قومی اسمبلی حماد اظہر گرفتار

 پاکستان تحریک انصاف کے سینئر رہنما اور سابق رکن قومی اسمبلی حماد اظہر کو پولیس نے گرفتار کرلیا۔

پولیس ذرائع کے مطابق حماد اظہر کو ملتان سے حراست میں لینے کے بعد لاہور پولیس کے حوالے کیا گیا، جہاں انہیں مزید تفتیش کے لیے انویسٹی گیشن ونگ منتقل کردیا گیا ہے۔

ذرائع کا کہنا ہے کہ حماد اظہر 9 مئی کے واقعات سے متعلق مختلف مقدمات میں مطلوب تھے اور عدم پیشی کے باعث انسداد دہشت گردی کی عدالت انہیں اشتہاری قرار دے چکی تھی، جبکہ ان کے دائمی وارنٹ گرفتاری بھی جاری کیے گئے تھے۔

پولیس کے مطابق حماد اظہر کے خلاف 9 مئی سے متعلق 50 سے زائد مقدمات درج ہیں۔ دوسری جانب حماد اظہر نے حفاظتی ضمانت کے لیے لاہور اور پشاور ہائی کورٹس سے بھی رجوع کر رکھا ہے۔

واضح رہے کہ مقدمات کے اندراج کے بعد حماد اظہر نے پارٹی عہدے سے استعفیٰ دے دیا تھا، جبکہ اس سے قبل وہ تحریک انصاف پنجاب کے صدر کی ذمہ داریاں بھی نبھا چکے ہیں۔