میر غلام قادر بگٹی کی دسویں برسی، وزیراعلیٰ بلوچستان کا خراجِ عقیدت

ڈیرہ بگٹی: بلوچستان کے قبائلی علاقے ڈیرہ بگٹی میں علم، شعور اور سیاسی و سماجی بیداری کے فروغ کے لیے خدمات انجام دینے والے رہنما میر غلام قادر بگٹی کی دسویں برسی آج عقیدت و احترام کے ساتھ منائی جا رہی ہے۔

اس موقع پر پاکستان ہاؤس سوئی، بیکٹر، لوٹی اور دیگر مقامات پر میر غلام قادر بگٹی کی یاد میں تعزیتی ریفرنسز کا انعقاد کیا جا رہا ہے، جہاں ان کی سیاسی، سماجی اور فکری خدمات کو خراجِ عقیدت پیش کیا جا رہا ہے۔

وزیراعلیٰ بلوچستان میر سرفراز بگٹی نے اپنے والد کی دسویں برسی پر انہیں خراجِ عقیدت پیش کرتے ہوئے کہا کہ میر غلام قادر بگٹی نے علم و شعور کے فروغ اور سیاسی و سماجی بیداری کے لیے نمایاں کردار ادا کیا۔ ان کی زندگی اصول پسندی، خودداری، علم دوستی اور اپنے لوگوں کی خدمت سے عبارت تھی۔

میر سرفراز بگٹی نے کہا کہ میر غلام قادر بگٹی صرف ان کے والد ہی نہیں بلکہ ان کے پہلے استاد اور رہنما بھی تھے، جنہوں نے مشکل حالات میں ثابت قدم رہنے، اصولوں پر قائم رہنے اور عوام کی خدمت کا درس دیا۔

وزیراعلیٰ نے کہا کہ والد کی جدوجہد اور خدمات آج بھی نئی نسل کے لیے رہنمائی کا ذریعہ ہیں۔ ان کی روشن فکری اور مثبت سوچ پر مبنی میراث کو آگے بڑھانا ہم سب کی ذمہ داری ہے۔

انہوں نے کہا کہ میر غلام قادر بگٹی کو دنیا سے رخصت ہوئے دس برس گزر چکے ہیں، تاہم ان کی یادیں، افکار اور تربیت آج بھی دلوں میں زندہ ہیں۔