چاغی بازار میں فائرنگ، بزرگ قبائلی شخصیت ملک کریم داد محمد حسنی جاں بحق

چاغی: بازار میں نامعلوم مسلح افراد کی فائرنگ سے بزرگ اور معتبر قبائلی شخصیت ملک کریم داد محمد حسنی جاں بحق ہوگئے۔

پولیس کے مطابق ملک کریم داد محمد حسنی چاغی بازار میں ایک دکان پر موجود تھے کہ چار مسلح افراد نے اچانک ان پر فائرنگ کردی، جس کے نتیجے میں وہ موقع پر ہی دم توڑ گئے۔

پولیس کا کہنا ہے کہ حملہ آور سلور رنگ کی کرولا ایکس گاڑی میں سوار تھے، جو واردات کے بعد موقع سے فرار ہوگئے۔

واقعے کی اطلاع ملتے ہی ایس ایچ او چاغی پولیس نفری کے ہمراہ جائے وقوعہ پر پہنچے اور شواہد اکٹھے کیے۔ پولیس نے واقعے کی تفتیش شروع کرتے ہوئے ملزمان کی گرفتاری کے لیے تلاش کا عمل بھی شروع کردیا ہے۔