اسماءامان اللہ کی انصاف کےلئے وزیراعلیٰ بلوچستان سے اپیل

اسماءامان اللہ کی انصاف کےلئے وزیراعلیٰ بلوچستان سے اپیل

قمبرانی روڈ کی رہائشی اسماءامان اللہ نے اپنی ہمشیرہ کے ہمراہ پریس کانفرنس کرتے ہوئے الزام عائد کیا ہے کہ 13 اگست کی شب ان کے کزنز نے گھر میں داخل ہو کر انہیں مبینہ طور پر شدید تشدد کا نشانہ بنایا۔ اسماءامان اللہ کے مطابق واقعے کی بنیادی وجہ رشتے سے انکار تھی۔اسماءامان اللہ نے کہا کہ خدا بخش نے رشتے سے انکار پر انہیں شدید تشدد کا نشانہ بنایا اور زخمی کیا۔ ان کا دعویٰ ہے کہ ملزم نے زبردستی نکاح کی کوشش بھی کی، تاہم مولوی نے نکاح پڑھانے سے انکار کر دیا۔انہوں نے الزام عائد کیا کہ اس کے بعد انہیں مبینہ طور پر باندھ کر اغوا کرنے اور جنسی زیادتی کا نشانہ بنانے کی کوشش کی گئی۔ اسماءکے مطابق انہیں گاڑی میں زبردستی لے جایا جا رہا تھا کہ ایک چیک پوسٹ پر ایف سی اہلکاروں نے مبینہ طور پر ملزمان کو گرفتار کر لیا۔اسماءامان اللہ کا مزید کہنا تھا کہ ان کی تعلیمی اسناد سمیت تقریباً 65 لاکھ روپے مالیت کا سامان بھی لے جایا گیا۔ انہوں نے دعویٰ کیا کہ واقعے میں خدا بخش، سراج، رفیق اور دیگر خالہ زاد مبینہ طور پر ملوث ہیں۔متاثرہ خاتون نے کہا کہ تشدد کے باعث وہ اس قدر زخمی ہوئی ہیں کہ چلنے پھرنے سے بھی قاصر ہیں اور انہیں خدشہ ہے کہ ملزمان اب بھی انہیں نقصان پہنچانے کے لیے تلاش کر رہے ہیں، جس کے باعث وہ خفیہ مقام پر رہنے پر مجبور ہیں۔اسماءامان اللہ نے روتے ہوئے وزیراعلیٰ بلوچستان میر سرفراز بگٹی سے انصاف کی اپیل کرتے ہوئے کہا کہ ”میرا قصور صرف یہ تھا کہ میں نے رشتے سے انکار کیا۔ میری عزت کو پامال کیا گیا، مجھے تحفظ اور انصاف فراہم کیا جائے۔“انہوں نے وزیراعلیٰ بلوچستان سے اپیل کی کہ واقعے کا فوری نوٹس لیتے ہوئے ذمہ دار افراد کے خلاف قانون کے مطابق کارروائی کی جائے اور انہیں تحفظ فراہم کیا جائے۔