قومی اسمبلی اور سینیٹ کے اہم اجلاس آج، نئے صوبوں کے قیام پر بحث کا امکان

اسلام آباد: قومی اسمبلی اور سینیٹ کے اہم اجلاس آج ہوں گے، جن میں اہم قانون سازی، مکہ امن معاہدے پر متفقہ قرارداد اور نئے صوبوں کے قیام کے معاملے پر تفصیلی بحث متوقع ہے۔

ذرائع کے مطابق دونوں ایوانوں کے اجلاس طویل وقفے کے بعد طلب کیے گئے ہیں۔ سینیٹ اجلاس کے لیے 69 نکاتی ایجنڈا جاری کیا گیا ہے، جس میں 10 قوانین منظوری کے لیے پیش کیے جائیں گے۔

سینیٹ ایجنڈے میں الیکشن ایکٹ ترمیمی بل 2026، اینٹی ریپ تحقیقات و مقدمہ ترمیمی بل، درآمدات و برآمدات کنٹرول ترمیمی بل، سائنس اینڈ ٹیکنالوجی زونز اتھارٹی ترمیمی بل، سول سرونٹس ترمیمی بل سمیت دیگر قوانین شامل ہیں۔

دوسری جانب قومی اسمبلی اجلاس کا 42 نکاتی ایجنڈا جاری کیا گیا ہے، جس میں 7 قوانین کی منظوری اور 4 نئے قوانین متعارف کرانے کی تجاویز شامل ہیں۔

قومی اسمبلی میں اوگرا ترمیمی بل 2026، وفاقی حکومت رئیل اسٹیٹ مینجمنٹ اتھارٹی کے قیام سے متعلق قوانین، ٹریول ایجنسیز، پاکستان ٹورسٹ گائیڈز، ہوٹلز اینڈ ریسٹورنٹس اور دیگر بلز زیر غور آئیں گے۔

اجلاسوں کے دوران نئے صوبوں کے قیام کے معاملے پر بھی ارکان اظہارِ خیال کریں گے، جبکہ سعودی عرب، ترکیہ اور پاکستان کے مکہ امن معاہدے سے متعلق متفقہ قرارداد بھی پیش کیے جانے کا امکان ہے۔