گنداواہ: ایم ایس ڈاکٹر منصور احمد کھوسہ کا ڈی ایچ کیو ہسپتال کا تفصیلی دورہ

گنداواہ(رپورٹ شیر احمد ساسولی نمائندہ صحافت) ڈسٹرکٹ ہیڈکوارٹر (ڈی ایچ کیو) ہسپتال گنداواہ کے میڈیکل سپرنٹنڈنٹ (ایم ایس) ڈاکٹر منصور احمد کھوسہ نے ہسپتال کا تفصیلی دورہ کیا۔ اس موقع پر انہوں نے BSDI کے تحت قائم بلڈ بینک میں نئی مشینری کی تنصیب، مین میڈیکل اسٹور اور ہسپتال کی لیبارٹری کا معائنہ کیا اور وہاں فراہم کی جانے والی طبی سہولیات کا جائزہ لیا۔
دورے کے دوران ڈاکٹر منصور احمد کھوسہ نے متعلقہ ڈاکٹروں اور ہسپتال کے عملے سے ملاقات کی اور مختلف شعبوں کی کارکردگی کا جائزہ لیتے ہوئے ضروری ہدایات جاری کیں۔ انہوں نے کہا کہ مریضوں کو بروقت، معیاری اور بہترین طبی سہولیات کی فراہمی ہسپتال انتظامیہ کی اولین ترجیح ہے، جبکہ علاج معالجے میں کسی بھی قسم کی غفلت یا کوتاہی ہرگز برداشت نہیں کی جائے گی۔
انہوں نے ہسپتال کے تمام عملے کو ہدایت کی کہ وہ اپنی پیشہ ورانہ ذمہ داریاں ایمانداری اور احساسِ ذمہ داری کے ساتھ انجام دیں تاکہ عوام کو بہتر طبی سہولیات میسر آ سکیں۔