خیبر پختونخوا میں سیکیورٹی فورسز کی کارروائی، متعدد خوارج جہنم واصل، اسلحہ برآمد

خیبرپختونخوا کے علاقے شمالی وزیرستان میں سیکیورٹی فورسز نے خفیہ اطلاع کی بنیاد پر کارروائی کرتے ہوئے متعدد دہشت گردوں کو ہلاک کر دیا، جبکہ کارروائی کے دوران بھاری مقدار میں اسلحہ، گولہ بارود اور دیگر سامان بھی برآمد کیا گیا۔

سیکیورٹی ذرائع کے مطابق شمالی وزیرستان کے علاقے کھٹی کلی میں انٹیلی جنس بیسڈ آپریشن کیا گیا، جس میں دہشت گردوں کے ٹھکانوں کو نشانہ بنایا گیا۔ کارروائی کے دوران متعدد شدت پسند مارے گئے جبکہ کچھ کے زخمی ہونے کی اطلاعات بھی سامنے آئی ہیں۔

ذرائع کا کہنا ہے کہ خیبرپختونخوا میں سیکیورٹی فورسز کی جانب سے دہشت گردی کے خاتمے اور امن کے قیام کے لیے مسلسل کارروائیاں جاری ہیں۔ آپریشنز کے دوران شہریوں کے تحفظ اور مقامی آبادی کو کسی بھی نقصان سے محفوظ رکھنے کو ترجیح دی جا رہی ہے۔

سیکیورٹی حکام کے مطابق علاقے میں امن و امان کی صورتحال بہتر بنانے کے لیے انٹیلی جنس معلومات کی بنیاد پر کارروائیاں آئندہ بھی جاری رہیں گی۔