ہنگو؛ نجی بینک پر مسلح نقاب پوش افراد کا حملہ، بینک منیجر اور کیشیئر اغوا

ہنگو کے علاقے ٹل میں مسلح نقاب پوش افراد نے نجی بینک پر حملہ کر کے بینک منیجر اور کیشیئر کو اغواء کر لیا۔

پولیس کے مطابق حملہ آوروں نے بینک میں داخل ہو کر فائرنگ کی، جس کے نتیجے میں بینک کے اندر موجود سامان کو نقصان پہنچا جبکہ سی سی ٹی وی کیمروں اور کمپیوٹرز کو بھی نقصان پہنچایا گیا۔

ابتدائی اطلاعات کے مطابق مسلح افراد بینک منیجر وسیم آفریدی اور کیشیئر علاءالدین کو اپنے ساتھ لے گئے اور انہیں چھپری ویزران کی جانب منتقل کیا گیا۔

واقعے کی اطلاع ملتے ہی سیکیورٹی فورسز اور قانون نافذ کرنے والے اداروں نے علاقے میں سرچ آپریشن شروع کر دیا۔ حکام نے علاقے کی ناکہ بندی کر کے ملزمان کی گرفتاری اور مغوی افراد کی بازیابی کے لیے کارروائیاں تیز کر دی ہیں۔