گورنر اور وزیراعلیٰ بلوچستان کا سی ایم ایچ کوئٹہ کا دورہ، زخمی جج طارق لاشاری کی عیادت

کوئٹہ: گورنر بلوچستان جعفر خان مندوخیل اور وزیراعلیٰ بلوچستان میر سرفراز بگٹی نے کمبائنڈ ملٹری ہسپتال (سی ایم ایچ) کوئٹہ کا دورہ کیا، جہاں انہوں نے مستونگ فائرنگ کے واقعے میں زخمی ہونے والے ایڈیشنل سیشن جج طارق لاشاری کی عیادت کی اور ان کی صحت کے بارے میں معلومات حاصل کیں۔

اس موقع پر گورنر اور وزیراعلیٰ بلوچستان نے زخمی جج کی جلد صحتیابی کے لیے نیک خواہشات کا اظہار کیا اور ان کے بہترین علاج و معالجے کی فراہمی پر زور دیا۔

وفد میں صوبائی وزراء، پارلیمانی سیکرٹریز اور اراکین بلوچستان اسمبلی بھی شامل تھے۔ حکومتی وفد نے واقعے کے بعد زخمیوں کو فراہم کی جانے والی طبی سہولیات کا بھی جائزہ لیا۔