آئی جی پولیس بلوچستان کا کلی ببری ہنہ کا دورہ، آپریشن سے متعلق بریفنگ

کوئٹہ: انسپکٹر جنرل پولیس بلوچستان محمد طاہر نے کلی ببری ہنہ اور شعبان سے ملحقہ علاقوں کا دورہ کیا، جہاں انہیں جاری آپریشن اور سیکیورٹی صورتحال سے متعلق تفصیلی بریفنگ دی گئی۔

آئی جی پولیس کے ہمراہ ڈی آئی جی پولیس کوئٹہ عمران شوکت، ایس ایس پی آپریشنز کوئٹہ محمد آصف خان، ایس پی سٹی ڈویژن آصف غفور سمیت دیگر پولیس افسران بھی موجود تھے۔

دورے کے دوران آئی جی پولیس بلوچستان کو کلی ببری اور شعبان کے علاقوں میں دہشت گردوں کے خلاف جاری کارروائیوں، سیکیورٹی انتظامات اور پولیس کی حکمت عملی سے آگاہ کیا گیا۔

محمد طاہر نے آپریشن میں حصہ لینے والے پولیس اہلکاروں سے ملاقات کی اور ان کے حوصلے کو سراہا۔ انہوں نے کہا کہ بلوچستان پولیس دہشت گردی کے خاتمے کے لیے دیگر قانون نافذ کرنے والے اداروں کے ساتھ مل کر اہم کردار ادا کر رہی ہے۔

انہوں نے کہا کہ امن و امان کے قیام اور عوام کے تحفظ کے لیے پولیس اہلکار اپنی ذمہ داریاں بھرپور انداز میں انجام دے رہے ہیں، جبکہ دہشت گردی کے خلاف کارروائیاں مزید مؤثر انداز میں جاری رہیں گی۔