حکومتی وفد اور دھرنا کمیٹی کے مذاکرات بے نتیجہ ختم، احتجاج جاری رکھنے کا اعلان

کوئٹہ: حکومتی وفد اور دھرنا کمیٹی کے درمیان مذاکرات کا تیسرا دور بھی کسی حتمی نتیجے کے بغیر ختم ہوگیا۔ مذاکراتی عمل رات گئے تک جاری رہا، تاہم فریقین کے درمیان معاملات پر اتفاق نہ ہو سکا۔

دھرنا کمیٹی کے رہنما نصراللہ خان زیرے کے مطابق حکومتی وفد کے ساتھ تقریباً چھ گھنٹے طویل مذاکرات ہوئے، جس میں کمیٹی نے اپنے مطالبات ایک بار پھر حکام کے سامنے رکھے۔

انہوں نے بتایا کہ حکومتی وفد نے مطالبات پر مشاورت کے لیے مزید وقت مانگا ہے، تاہم دھرنا بدستور اسی مقام پر جاری رہے گا۔

نصراللہ خان زیرے کا کہنا تھا کہ لواحقین کی رضامندی اور اطمینان کے بغیر حکومت کے ساتھ کوئی فیصلہ نہیں کیا جائے گا۔ انہوں نے کہا کہ آل پارٹیز کے اعلان کردہ احتجاجی مظاہروں اور ہڑتال کے شیڈول پر بھی عملدرآمد جاری رہے گا۔

دھرنا کمیٹی اور حکومتی وفد کے درمیان مذاکرات کے آئندہ مرحلے سے متعلق فیصلہ مشاورت کے بعد کیا جائے گا۔