پاکستان میں ادائیگیوں کا انداز بدل گیا، 88 فیصد لین دین اب ڈیجیٹل

اسلام آباد: پاکستان میں ڈیجیٹل بینکاری اور آن لائن ادائیگیوں کے رجحان میں نمایاں اضافہ دیکھنے میں آیا ہے، جس کے باعث ملک میں مالی لین دین تیزی سے ڈیجیٹل نظام کی جانب منتقل ہو رہا ہے۔

پاکستان بینکس ایسوسی ایشن (PBA) کے مطابق ملک میں اب تقریباً 88 فیصد ادائیگیاں ڈیجیٹل ذرائع سے انجام دی جا رہی ہیں، جو مالیاتی شعبے میں جدید ٹیکنالوجی کے بڑھتے ہوئے استعمال کی عکاسی کرتا ہے۔

ایسوسی ایشن کے مطابق ڈیجیٹل لین دین کی تعداد میں مسلسل اضافہ ریکارڈ کیا جا رہا ہے، جبکہ ڈیجیٹل ادائیگیوں کی مجموعی مالیت میں بھی 12 فیصد اضافہ ہوا ہے۔ تاہم پی بی اے نے واضح کیا کہ لین دین کی تعداد میں اضافے کا مطلب لازمی طور پر مالی حجم میں اسی تناسب سے اضافہ نہیں ہوتا۔

پی بی اے کا کہنا ہے کہ رواں سال ریٹیل بینکنگ اور مالیاتی شعبے سے متعلق اہم اجلاس منعقد کیے جائیں گے، جن میں ڈیجیٹل بینکاری کے فروغ، صارفین کو بہتر سہولتوں کی فراہمی اور مالی شمولیت کو مزید وسعت دینے کے اقدامات پر غور کیا جائے گا۔