سیپکو کی بحالیِ بجلی مہم میں پیش رفت، 46 میں سے 16 گرڈ اسٹیشنز بحال، 137 فیڈرز فعال

سکھر ( رپورٹ اسلم سومرو) شدید آندھی، طوفانی ہواؤں اور موسلا دھار بارشوں سے متاثرہ سیپکو ریجن میں بجلی کی بحالی کا آپریشن تیزی سے جاری ہے۔ سیپکو انتظامیہ کے مطابق فیلڈ ٹیموں کی شبانہ روز محنت کے نتیجے میں متاثرہ 46 گرڈ اسٹیشنز میں سے 16 گرڈ اسٹیشنز سے بجلی کی فراہمی بحال کر دی گئی ہے جبکہ 137 عدد 11 کے وی فیڈرز کو دوبارہ فعال کر دیا گیا ہےجن گرڈ اسٹیشنز سے بجلی بحال کی گئی ان میں ٹھارو شاہ، کنڈیارو، محراب پور، بھریا روڈ، گمبٹ، رسول آباد، کنب، خیرپور، پیر جو گوٹھ، کوٹ ڈیجی، چنڈیکو، روہڑی، لکھی غلام شاہ، نارا ون، نارا ٹو اور ٹھری میرواہ شامل ہیں چیئرمین بورڈ آف ڈائریکٹرز غلام مصطفیٰ لغاری کی ہدایات اور چیف ایگزیکٹو آفیسر انجینئر اعجاز احمد چنہ کی نگرانی میں بحالی کا کام ہنگامی بنیادوں پر جاری ہے۔ سی ای او خود فیلڈ میں موجود رہ کر کام کا جائزہ لے رہے ہیں۔ سیپکو کی آپریشن، تعمیرات، جی ایس او اور فیلڈ ٹیمیں باقی متاثرہ گرڈ اسٹیشنز، ٹرانسمیشن لائنوں اور فیڈرز کی بحالی میں مصروف ہیں۔ متعدد مقامات پر پولز، ٹاورز اور لائنوں کو پہنچنے والے نقصان کی مرمت بھی جاری ہے سی ای او انجینئر اعجاز احمد چنہ نے فیلڈ عملے کی خدمات کو سراہتے ہوئے صارفین کو یقین دلایا کہ باقی متاثرہ علاقوں میں بھی جلد بجلی بحال کر دی جائے گی۔ سیپکو انتظامیہ نے صارفین کے صبر اور تعاون پر شکریہ ادا کیا ہے۔