ایران نے جوہری ہتھیاروں سے مکمل لاتعلقی پر آمادگی ظاہر کر دی، ٹرمپ کا دعویٰ

واشنگٹن: امریکی صدر ڈونلڈ ٹرمپ نے دعویٰ کیا ہے کہ ایران نے نہ صرف جوہری ہتھیار تیار نہ کرنے بلکہ کسی بھی ذریعے سے ایسے ہتھیار حاصل یا خریدنے سے بھی گریز کرنے کی یقین دہانی کرا دی ہے، جسے انہوں نے جاری مذاکرات میں اہم پیش رفت قرار دیا ہے۔

ایک امریکی نیوز چینل کو انٹرویو دیتے ہوئے صدر ٹرمپ نے کہا کہ وہ کشیدگی اور تصادم کے بجائے سفارتی معاہدے کو ترجیح دیتے ہیں۔ ان کے بقول کسی ممکنہ معاہدے کے بعد آبنائے ہرمز کو فوری طور پر کھولنے کی راہ ہموار ہو سکتی ہے۔

ٹرمپ نے کہا کہ امریکہ کی بنیادی شرط یہ ہے کہ ایران کسی بھی صورت جوہری ہتھیاروں کا حامل نہ بنے۔ انہوں نے دعویٰ کیا کہ ابتدا میں ایران کا مؤقف صرف جوہری ہتھیار تیار نہ کرنے تک محدود تھا، تاہم امریکی تحفظات کے بعد اس میں یہ نکتہ بھی شامل کیا گیا کہ ایران کسی بھی ذریعہ سے جوہری نوعیت کے عسکری ہتھیار حاصل کرنے یا خریدنے کی کوشش نہیں کرے گا۔

امریکی صدر کے مطابق ایرانی مذاکرات کار سخت مؤقف اختیار کیے ہوئے ہیں جس کے باعث مذاکرات میں پیش رفت سست روی کا شکار ہے، تاہم بات چیت کا عمل جاری ہے