فاطمہ جناحؒ کی جدوجہد، دیانت اور قومی خدمات تاریخ کا روشن باب ہیں، فیصل خان جمالی

گنداخہ: (نامہ نگار فریداحمد) صوبائی وزیر لائیو اسٹاک سردارزادہ فیصل خان جمالی نے مادرِ ملت محترمہ فاطمہ جناحؒ کے 133ویں یومِ پیدائش کے موقع پر انہیں شاندار الفاظ میں خراجِ عقیدت پیش کرتے ہوئے کہا ہے کہ محترمہ فاطمہ جناحؒ پاکستان کی تاریخ کی ایک عظیم، باوقار اور جمہوریت پسند رہنما تھیں، جنہوں نے قیامِ پاکستان سے لے کر ملک میں جمہوری اقدار، آئین کی بالادستی اور عوامی حقوق کے تحفظ کے لیے ناقابلِ فراموش کردار ادا کیا۔اپنے جاری کردہ بیان میں انہوں نے کہا کہ مادرِ ملت نے بانیٔ پاکستان قائداعظم محمد علی جناحؒ کی رفیقِ کار اور ہم سفر بن کر تحریکِ پاکستان کو کامیابی سے ہمکنار کرنے میں اہم کردار ادا کیا۔ قیامِ پاکستان کے بعد بھی انہوں نے اصول پسندی، دیانت داری، قومی یکجہتی اور عوامی خدمت کا جو اعلیٰ معیار قائم کیا، وہ آج بھی پوری قوم کے لیے مشعلِ راہ ہے۔سردارزادہ فیصل خان جمالی نے کہا کہ محترمہ فاطمہ جناحؒ خواتین کے وقار، خودمختاری اور قومی شعور کی علامت تھیں۔ ان کی سیاسی بصیرت، جرات مندانہ قیادت اور جمہوریت کے لیے جدوجہد کو تاریخ ہمیشہ سنہری الفاظ میں یاد رکھے گی۔ انہوں نے کہا کہ مادرِ ملت کی خدمات صرف ایک شخصیت کی خدمات نہیں بلکہ پاکستان کے استحکام، ترقی اور قومی یکجہتی کی بنیاد ہیں،انہوں نے کہا کہ آج کا دن اس عزم کی تجدید کا متقاضی ہے کہ ہم مادرِ ملت کے افکار، کردار، دیانت، حب الوطنی اور عوامی خدمت کے جذبے کو اپنی عملی زندگی کا حصہ بنائیں اور ایک مضبوط، متحد، ترقی یافتہ اور خوشحال پاکستان کی تعمیر میں اپنا بھرپور کردار ادا کریں۔ انہوں نے مزید کہا کہ قوم محترمہ فاطمہ جناحؒ کی بے مثال قربانیوں، قومی خدمات اور جمہوریت کے لیے ان کی تاریخی جدوجہد کو ہمیشہ عزت، احترام اور فخر کے ساتھ یاد رکھے گی۔