معروف قبائلی و سماجی شخصیت ڈاکٹر عبدالرحیم رخشانی انتقال کر گئے

گنداخہ:(نامہ نگار) معروف قبائلی، سماجی شخصیت اور محکمہ صحت کے ریٹائرڈ ڈسٹرکٹ ہیلتھ آفیسر (ڈی ایچ او) ڈاکٹر عبد الرحیم رخشانی طویل علالت کے بعد آج حیدرآباد میں انتقال کر گئے۔ ان کی وفات کی خبر سن کر سیاسی، سماجی، قبائلی اور عوامی حلقوں میں گہرے دکھ اور افسوس کی لہر دوڑ گئی۔تعزیتی بیانات میں مقررین نے کہا کہ مرحوم ڈاکٹر عبد الرحیم رخشانی ایک نہایت نیک دل، ملنسار، خوش اخلاق اور باوقار شخصیت کے مالک تھے، جنہوں نے پوری زندگی انسانیت کی خدمت، بھائی چارے، محبت، رواداری اور باہمی ہم آہنگی کے فروغ کے لیے گرانقدر خدمات انجام دیں۔ وہ پیشہ ورانہ ذمہ داریوں کی ادائیگی کے دوران غریب، نادار اور مستحق مریضوں کے ساتھ انتہائی شفقت، ہمدردی اور خندہ پیشانی سے پیش آتے تھے، جس کی وجہ سے انہیں عوام میں بے حد عزت و احترام حاصل تھا۔سیاسی، سماجی اور عوامی رہنماؤں نے اپنے تعزیتی پیغامات میں کہا کہ ڈاکٹر عبد الرحیم رخشانی کی وفات گنداخہ اور گردونواح کے لیے ایک ناقابلِ تلافی نقصان اور عظیم سانحہ ہے۔ ان کی علمی، سماجی اور فلاحی خدمات کو ہمیشہ قدر و احترام کی نگاہ سے یاد رکھا جائے گا، جبکہ ان کا اخلاق، کردار اور انسان دوستی آنے والی نسلوں کے لیے مشعلِ راہ رہے گی۔رہنماؤں نے مرحوم کے درجات کی بلندی، جنت الفردوس میں اعلیٰ مقام اور لواحقین کے لیے صبرِ جمیل کی دعا کرتے ہوئے کہا کہ اللہ تعالیٰ مرحوم کی کامل مغفرت فرمائے اور سوگوار خاندان کو یہ عظیم صدمہ برداشت کرنے کی توفیق عطا فرمائے۔ آمین۔