سرکاری بس کے غلط استعمال پر ایکشن، گرلز کالج بارکھان کی پرنسپل معطل

حکومت بلوچستان نے سرکاری بس کے مبینہ غیر قانونی استعمال پر سخت نوٹس لیتے ہوئے گورنمنٹ گرلز کالج بارکھان کی پرنسپل کو معطل کر دیا ہے۔

ترجمان کے مطابق سوشل میڈیا پر سرکاری بس کے غلط استعمال کی ویڈیو وائرل ہونے کے بعد فوری کارروائی عمل میں لائی گئی۔ سیکرٹری ہائیر ایجوکیشن بلوچستان نے پرنسپل کو 90 روز کے لیے معطل کرنے کا باقاعدہ نوٹیفکیشن جاری کر دیا۔

محکمہ ہائیر ایجوکیشن کے اعلامیے میں کہا گیا ہے کہ واقعے کی مکمل تحقیقات کے لیے انکوائری کا حکم دے دیا گیا ہے، اور رپورٹ مکمل ہونے پر اعلیٰ حکام کو پیش کی جائے گی۔