سانحہ گل پلازہ: جوڈیشل کمیشن کی تحقیقات مکمل، رپورٹ حکومت سندھ کے سپرد

کراچی (ویب ڈیسک): گل پلازہ میں 17 جنوری 2026 کو لگنے والی آگ کے نتیجے میں 73 سے زائد شہری جاں بحق ہونے کے بعد جوڈیشل کمیشن کی تحقیقات مکمل ہو گئی ہیں اور رپورٹ سیکریٹری قانون کے حوالے کر دی گئی ہے۔

کمیشن کے سربراہ جسٹس آغا فیصل نے کہا کہ کمیشن کے ممبران نے محنت سے کام کیا، جبکہ میڈیا نے بھی تحقیقات میں اہم کردار ادا کیا۔ سیکریٹری قانون کے مطابق رپورٹ چیف سیکریٹری کو دی جائے گی اور اسے پبلک کرنے یا نہ کرنے کا فیصلہ حکومت کرے گی۔

سانحے میں جاں بحق افراد میں 6 کی لاشیں سلامت ملیں جبکہ دیگر کی باقیات برآمد ہوئیں۔ سندھ حکومت نے 10 فروری کو جوڈیشل کمیشن کا قیام نوٹیفائی کیا اور 14 فروری کو کمیشن نے گل پلازہ کا دورہ کیا۔

تحقیقات میں متاثرین، امدادی اداروں، فائر بریگیڈ، ریسکیو 1122، ایدھی، چھیپا، کے الیکٹرک، سوئی گیس، سندھ بلڈنگ کنٹرول اتھارٹی، کے ایم سی، پولیس، صحافیوں اور عینی شاہدین کے بیانات شامل کیے گئے۔ مزید جرح میں تکنیکی ماہرین اور متعلقہ اداروں کے نمائندگان کو بھی شامل کیا گیا۔