تہران میں پاکستانی سفارتخانے کے قریب بمباری، سفیر اور عملہ محفوظ

تہران میں پاکستانی سفارتخانے اور سفیر کی رہائشگاہ کے قریب شدید بمباری کی اطلاعات سامنے آئی ہیں، تاہم تمام پاکستانی سفارتی عملہ محفوظ رہا۔

سفارتی ذرائع کے مطابق رات تقریباً 8 بجے کے قریب بمباری کا آغاز ہوا، جس کے دوران سفارتخانے کے اطراف میں زور دار دھماکوں کی آوازیں سنائی دیں۔ بتایا گیا ہے کہ سفارتخانے کے سامنے ایرانی فوج کا مرکز ’ارتش‘ موجود ہے، جو ممکنہ طور پر حملے کا نشانہ تھا۔

ذرائع کے مطابق پاکستان کے سفیر مدثر ٹیپو پاسداران کے زیر انتظام علاقے میں مقیم ہیں، جہاں بھی بمباری کی گئی، تاہم خوش قسمتی سے نہ سفارتخانے کو نقصان پہنچا اور نہ ہی سفیر کی رہائشگاہ متاثر ہوئی۔

مزید بتایا گیا ہے کہ سفیر مدثر ٹیپو تقریباً 20 رکنی عملے کے ساتھ معمول کے مطابق فرائض سرانجام دے رہے ہیں۔ ایک سینئر سفارتکار کے مطابق دھماکے انتہائی شدید تھے جس سے عملہ کچھ دیر کے لیے پریشان ہوا، تاہم تمام افراد محفوظ رہے۔

سفارتی ذرائع کا کہنا ہے کہ کشیدہ صورتحال کے باوجود پاکستانی سفارتی عملہ اپنی ذمہ داریاں جاری رکھے ہوئے ہے اور حالات پر مسلسل کڑی نظر رکھی جا رہی ہے۔