بلیدی اور کھوسو برادریوں کے درمیان کئی ماہ سے جاری کشیدگی ختم، قبائلی عمائدین کی کوششوں سے صلح ہوگئی

صحبت پور (بیوروچیف شاہد گولہ)بلیدی اور کھوسو برادریوں کے درمیان چند مہینوں سے جاری کشیدگی کا خاتمہ نہ صرف دو قبائل کا ملن ہے، بلکہ پورے بلوچ سماج کے لیے اتحاد، امن اور اخوت کا ایک روشن باب ہے۔میر اقبال احمد خان بجارانی کی دانشمندانہ کاوشوں اور میر نثار احمد خان کھوسو کی بصیرت افروز قیادت کی بدولت ڈیرہ مراد جمالی کی فضاؤں میں چھائے تنازع کے بادل چھٹ گئے اور بلوچی روایت کو زندہ رکھا اور دوستی و بھائی چارے کی نئی صبح کا آغاز ہوا۔ دونوں برادریوں نے جس فراخ دلی کے ساتھ اس فیصلے کو سرخم تسلیم کیا، وہ قبائلی تاریخ میں رواداری اور باہمی احترام کی ایک باوقار مثال بن چکا ہے۔اس مسرت کے موقع پر بلیدی برادری کے معززین کا سکھر میں میر اقبال احمد خان بجارانی کے ڈیرے پر جا کر شکریہ ادا کرنا اس بات کا ثبوت ہے کہ بلوچ روایت میں امن کا ہاتھ تھامنے والوں کا مقام ہمیشہ بلند رہا ہے۔ میر اقبال احمد خان بجارانی اور میر نثار خان کھوسو کا یہ کردار سنہرے حروف سے لکھنے کے قابل ہے، جس نے نہ صرف ایک تنازع کا خاتمہ کیا بلکہ بلوچ قوم کے درمیان یگانگت اور یکجہتی کا پائیدار رشتہ استوار کر دیا۔