عمران خان کی شفا انٹرنیشنل اسپتال منتقلی کی درخواست مسترد، عدالت کا میڈیکل بورڈ کی تشکیل کا حکم

اسلام آباد: اسلام آباد ہائیکورٹ نے بانی پاکستان تحریکِ انصاف عمران خان کی شفا انٹرنیشنل اسپتال منتقلی کی درخواست پر فیصلہ سناتے ہوئے میڈیکل بورڈ تشکیل دینے کا حکم دے دیا۔

عدالت میں جسٹس ارباب محمد طاہر اور جسٹس خادم حسین سومرو نے سماعت کی، جس میں بانی پی ٹی آئی کی جانب سے سردار لطیف کھوسہ پیش ہوئے جبکہ ایڈوکیٹ جنرل اسلام آباد ایاز شوکت اور ایڈیشنل اٹارنی جنرل راشد حفیظ بھی موجود تھے۔

سردار لطیف کھوسہ نے عدالت کو بتایا کہ عمران خان اکتوبر سے دائیں آنکھ کی بینائی کے مسئلے کا شکار ہیں، جیل ڈاکٹروں نے معاملہ نارمل قرار دیا، مگر بینائی تقریباً ختم ہونے پر انہیں پمز منتقل کیا گیا اور فیملی و وکلاء کو بروقت آگاہ نہیں کیا گیا۔

عدالت نے کہا کہ میڈیکل بورڈ تشکیل دیا جائے، جس میں بانی کے ذاتی معالجین بھی شامل ہوں، اور جیل رولز کے مطابق فیملی کو صورتحال سے آگاہ کیا جائے۔ عدالت نے ڈاکٹر عارف اور ڈاکٹر ندیم قریشی کو میڈیکل بورڈ میں شامل کرنے اور فیملی کے ساتھ رابطے میں رہنے کی ہدایت دی۔

فیصلے کے مطابق میڈیکل بورڈ طے کرے گا کہ بانی پی ٹی آئی کو ہسپتال منتقل کرنا ہے یا نہیں، اور چیف کمشنر اسلام آباد اس بورڈ کی تشکیل کریں گے۔