مشرق وسطیٰ میں کشیدگی: وزیراعظم ہنگامی سرکاری دورے پر سعودی عرب روانہ

اسلام آباد: وزیراعظم شہباز شریف چند گھنٹوں کے ہنگامی سرکاری دورے پر سعودی عرب روانہ ہوگئے۔ دفتر خارجہ کے ترجمان طاہر حسن اندرابی کے مطابق وزیراعظم سعودی ولی عہد محمد بن سلمان کی دعوت پر روانہ ہوئے، جبکہ نائب وزیراعظم و وزیر خارجہ اسحاق ڈار بھی ان کے ہمراہ ہیں۔

دفتر خارجہ کے ترجمان نے ہفتہ وار پریس بریفنگ میں بتایا کہ دورے کے دوران شہباز شریف اور سعودی ولی عہد خطے میں جاری کشیدگی، علاقائی سکیورٹی صورتحال اور دونوں ممالک کے باہمی تعلقات پر بات چیت کریں گے۔

انہوں نے مزید کہا کہ وزیراعظم کا دورہ انتہائی اہمیت کا حامل ہے اور یہ دو طرفہ مشاورت، خطے میں امن و سلامتی کے امور اور سفارتی رابطوں کا حصہ ہے۔ پاکستان خطے میں کشیدگی کے خاتمے، جنگ بندی، مذاکرات اور سفارتکاری کے لیے اپنی کوششیں جاری رکھے گا۔