گنداخہ شاخ میں بھل صفائی کا کام جاری، زمینداروں اور آبادگاروں کا صوبائی وزیر فیصل خان جمالی سے اظہارِ تشکر

گنداخہ شاخ میں صوبائی وزیر سردارزادہ فیصل خان جمالی کی ذاتی فنڈ سے بھل صفائی کا کام جاری، زمینداروں اور آبادگاروں کا اظہارِ تشکر

گنداخہ (نورحسن جمالی) صوبائی وزیرِ لائیو اسٹاک سردارزادہ میر فیصل خان جمالی کی کوششوں اور زاتی فنڈ سے گنداخہ شاخ میں بھل صفائی کا کام جاری ہے۔ جاری کام کا معروف سیاسی و سماجی شخصیات سید غفار علی شاہ، میر شیراز خان جمالی، عادل حسین جمالی، گلاب خان جمالی، عبدالکریم جمالی و دیگر نے معائنہ کیا۔
اس موقع پر گفتگو کرتے ہوئے انہوں نے کہا کہ گنداخہ شاخ میں بھل صفائی کا کام زمینداروں اور آبادگاروں کے وسیع تر مفاد میں ایک اہم اور اجتماعی اقدام ہے۔ اس سے نہ صرف نہری پانی کی روانی بہتر بنانے میں مدد ملے گی بلکہ ٹیل کے علاقوں تک پانی کی فراہمی میں بھی بہتری آنے کی امید ہے، جس سے کاشتکاروں کو درپیش پانی کی مشکلات میں کمی آئے گی۔
انہوں نے کہا کہ ہم صوبائی وزیرِ لائیو اسٹاک سردارزادہ میر فیصل خان جمالی کے تہہ دل سے مشکور ہیں کہ انہوں نے اپنی ذاتی کوششوں اور فنڈ سے گنداخہ شاخ کی بھل صفائی کا کام شروع کروایا، جو زراعت اور آبادگاروں کے لیے ایک مثبت اور قابلِ ستائش اقدام ہے۔
انہوں نے مزید کہا کہ نہری نظام کی بہتری اور پانی کی منصفانہ فراہمی کے لیے بھل صفائی انتہائی ضروری ہے۔
اس موقع پر داروغہ ایریگیشن گنداخہ شاخ خالد حسین لہڑی، گنداخہ پریس کلب کے صدر سلیم گوپانگ، صحافی نور حسن جمالی سمیت دیگر شخصیات بھی موجود تھیں۔ شرکاء نے جاری کام پر اطمینان کا اظہار کرتے ہوئے امید ظاہر کی کہ بھل صفائی کا کام جلد مکمل کرکے زمینداروں اور آبادگاروں کو اس کے ثمرات پہنچائے جائیں گے۔