لکی مروت: پولیس کے ساتھ جھڑپ میں خودکش بمبار سمیت 2 خارجی دہشتگرد ہلاک

لکی مروت: گنڈی چوک کے علاقے میں پولیس کے ساتھ جھڑپ کے دوران خودکش بمبار سمیت دو مبینہ دہشت گرد ہلاک ہوگئے، جبکہ ایک زخمی ساتھی فرار ہونے میں کامیاب ہوگیا۔

پولیس کے مطابق گنڈی چوک پر ایک مشکوک گاڑی کی اطلاع ملنے پر پولیس اور امن کمیٹی کے اہلکاروں نے کارروائی کی۔ پولیس کو دیکھتے ہی گاڑی میں سوار مشتبہ افراد نے فائرنگ شروع کردی، جس کے بعد جھڑپ میں دو افراد ہلاک ہوگئے۔

آئی جی خیبر پختونخوا ذوالفقار حمید نے کارروائی پر پولیس اہلکاروں کو خراج تحسین پیش کرتے ہوئے کہا کہ بروقت کارروائی سے دہشت گردوں کے مبینہ عزائم ناکام بنائے گئے۔ ان کا کہنا تھا کہ عوام کے جان و مال کا تحفظ کرنے والے پولیس اہلکار قوم کے ہیرو ہیں اور دہشت گردی کے خاتمے تک جدوجہد جاری رہے گی۔

ذرائع کے مطابق گاڑی سے اسلحہ، کالعدم تنظیم کے جھنڈے اور دیگر سامان بھی برآمد ہوا ہے۔ واقعے کے بعد پولیس اور سی ٹی ڈی کی نفری موقع پر پہنچ گئی، جبکہ فرار ہونے والے زخمی شخص کی تلاش کے لیے سرچ آپریشن جاری ہے۔