وفاقی حکومت کا خیبر پختونخوا میں ٹرانسفارمر بیسڈ لوڈ مینجمنٹ سسٹم متعارف کروانے کا فیصلہ

پشاور: وفاقی حکومت نے خیبر پختونخوا میں بجلی کی لوڈشیڈنگ کے مسئلے سے نمٹنے کے لیے ٹرانسفارمر بیسڈ لوڈ مینجمنٹ سسٹم متعارف کرانے کا فیصلہ کیا ہے۔ وفاقی وزیر توانائی اویس احمد لغاری نے گورنر فیصل کریم کنڈی کو زیادہ نقصانات والے علاقوں میں بھی لوڈشیڈنگ کا دورانیہ کم کرنے کی یقین دہانی کرائی ہے۔

وزیر اعظم شہباز شریف کی ہدایت پر خیبر پختونخوا کے توانائی مسائل کے پائیدار حل کے لیے وفاقی اور صوبائی قیادت کا مشاورتی اجلاس منعقد ہوا، جس میں وفاقی وزیر توانائی اویس احمد لغاری، وفاقی وزیر پیٹرولیم، گورنر فیصل کریم کنڈی اور چیف سیکرٹری خیبر پختونخوا نے شرکت کی۔

اجلاس میں گورنر فیصل کریم کنڈی نے صوبے میں طویل لوڈشیڈنگ کا معاملہ اٹھاتے ہوئے زیادہ نقصانات والے علاقوں میں بھی بجلی کی بندش کا دورانیہ کم سے کم رکھنے اور عوام کو ریلیف فراہم کرنے کے لیے فوری اقدامات پر زور دیا۔

نئے نظام کے تحت پورے فیڈر کے بجائے انفرادی ٹرانسفارمرز کی سطح پر لوڈ مینجمنٹ کی جائے گی، جس سے بجلی کے بل باقاعدگی سے ادا کرنے والے صارفین کو لوڈشیڈنگ میں ریلیف مل سکے گا۔

اجلاس میں وفاقی حکومت اور صوبائی قیادت نے خیبر پختونخوا کے توانائی مسائل کے حل اور عوام کو فوری ریلیف فراہم کرنے کے لیے مشترکہ اقدامات جاری رکھنے پر اتفاق کیا۔