ٹرمپ نے امریکی انتخابات میں شکست تسلیم کرلی، ڈیموکریٹس کے ساتھ مل کر کام کرنے کا اعلان

واشنگٹن: امریکی صدر ڈونلڈ ٹرمپ نے وسط مدتی انتخابات میں ریپبلکن پارٹی کی شکست کے بعد انتخابی نتائج قبول کرنے اور ڈیموکریٹس کے ساتھ مل کر کام کرنے پر آمادگی ظاہر کردی ہے۔ ان کا کہنا ہے کہ دونوں جماعتیں بعض معاملات پر اتفاقِ رائے پیدا کرسکتی ہیں۔

ایک انٹرویو میں ٹرمپ نے کہا کہ وہ انتخابی نتائج تسلیم کرنے کے لیے تیار ہیں اور اپوزیشن کے ساتھ تعاون کی راہ نکالیں گے۔ انہوں نے امید ظاہر کی کہ دونوں جماعتیں کسی سمجھوتے تک پہنچ سکتی ہیں۔

ریپبلکن امیدواروں کی شکست پر تبصرہ کرتے ہوئے ٹرمپ نے مؤقف اختیار کیا کہ ان کا نام بیلٹ پر نہ ہونے کے باعث پارٹی کی کارکردگی متاثر ہوئی۔ ان کے بقول اگر وہ خود انتخاب لڑ رہے ہوتے تو نتائج مختلف ہوسکتے تھے۔ انہوں نے ناکام ہونے والے امیدواروں کی حمایت کے فیصلے کا بھی دفاع کیا اور کہا کہ انہیں اس پر کوئی پچھتاوا نہیں۔

ٹرمپ نے انٹرویو میں ایران کے خلاف جنگ شروع کرنے کے اپنے فیصلے کو بھی درست قرار دیتے ہوئے اسے دانش مندانہ فیصلہ قرار دیا۔

دوسری جانب انتخابی نتائج کے بعد ٹرمپ نے اپنے سوشل میڈیا پلیٹ فارم پر کہا کہ وہ امیدواروں کی کامیابی اور ناکامی کی وجوہات کا تجزیہ کریں گے۔ انہوں نے خود کو سیاسی مبصر کے طور پر پیش کرنے کا عندیہ بھی دیا۔

امریکی صدر نے ایک سرخ ٹوپی کی تصویر بھی شیئر کی جس پر ’’ویٹو‘‘ درج تھا۔ اس کے ذریعے انہوں نے اپنے اس مؤقف کا اعادہ کیا کہ ڈیموکریٹس کی جانب سے کانگریس میں قانون سازی کی صورت میں وہ صدارتی ویٹو کا اختیار استعمال کرسکتے ہیں۔

ٹرمپ نے اپنی دوسری صدارتی مدت کے ابتدائی دو برسوں پر اطمینان کا اظہار کرتے ہوئے کہا کہ انہیں اپنے اقدامات پر کوئی افسوس نہیں۔