سکھر: پنوعاقل میں پولیس مقابلہ، 30 لاکھ روپے انعام یافتہ مطلوب ڈاکو عبدالقادر عرف قادرو جاگیرانی ہلاک

سکھر۔پنوعاقل میں پولیس مقابلہ، 30 لاکھ روپے انعام یافتہ خطرناک ڈاکو عبدالقادر عرف قادرو جاگیرانی ہلاک، کلاشنکوف برآمد

سکھر(رپورٹ اسلم سومرو)پنوعاقل کے علاقے میں پولیس اور جرائم پیشہ عناصر کے درمیان مبینہ مقابلے کے دوران 30 لاکھ روپے انعام یافتہ خطرناک ڈاکو عبدالقادر عرف قادرو جاگیرانی ہلاک ہوگیا۔ پولیس کے مطابق مقابلہ سانگی تھانے کی حدود میں پیش آیا، جہاں فائرنگ کے تبادلے کے دوران مطلوب ڈاکو مارا گیا۔ پولیس نے ہلاک ملزم کے قبضے سے ایک کلاشنکوف بھی برآمد کرنے کا دعویٰ کیا ہے۔پولیس ذرائع کے مطابق ہلاک ہونے والا ڈاکو عبدالقادر عرف قادرو جاگیرانی انتہائی مطلوب اور سنگین جرائم میں ملوث تھا، جس کے سر کی قیمت 30 لاکھ روپے مقرر تھی۔ ملزم پاکستان رینجرز پر حملے، پولیس اہلکاروں کی شہادت، اغوا برائے تاوان، بھتہ خوری، سی پیک روڈ سے شہریوں کو اغوا کرنے کی وارداتوں اور دہشت گردی سمیت متعدد سنگین مقدمات میں پولیس کو مطلوب تھا۔پولیس کا کہنا ہے کہ ملزم کے خلاف مختلف سنگین جرائم کے مقدمات درج تھے اور اس کی گرفتاری کے لیے کوششیں جاری تھیں۔ سانگی تھانے کی حدود میں پولیس مقابلے کے دوران اس کی ہلاکت کو اہم کامیابی قرار دیا جا رہا ہے۔واقعے کے بعد پولیس نے برآمد ہونے والے اسلحے کو تحویل میں لے کر مزید قانونی کارروائی شروع کر دی ہے، جبکہ مقابلے اور ہلاک ملزم کے حوالے سے مزید تفصیلات سامنے آنے کا انتظار ہے۔