لکپاس کسٹم چیک پوسٹ پر زیادتیوں کا نوٹس لیا جائے، ٹرانسپورٹرز

لکپاس کسٹم چیک پوسٹ پر زیادتیوں کا نوٹس لیا جائے، ٹرانسپورٹرز
نئے تعینات عملے کا مسافر کوچز کے ساتھ نامناسب رویہ ناقابلِ قبول ہے، مرکزی ترجمان آل بلوچستان ٹرانسپورٹرز ایکشن کمیٹی
تلاشی کے نام پر مسافر کوچز کو گھنٹوں روکنے سے مسافروں کو شدید مشکلات کا سامنا کرنا پڑ رہا ہے، اعلیٰ حکام نوٹس لیں۔
کوئٹہ: آل بلوچستان ٹرانسپورٹرز ایکشن کمیٹی کے مرکزی ترجمان نے لکپاس کسٹم چیک پوسٹ پر نئے تعینات ہونے والے عملے کی جانب سے مسافر کوچز کو مبینہ طور پر بلاوجہ تنگ کرنے، نامناسب رویہ اختیار کرنے اور تلاشی کے نام پر گھنٹوں روکنے پر شدید تشویش کا اظہار کرتے ہوئے کہا ہے کہ مسافر کوچز کو طویل وقت تک روکنے سے نہ صرف ٹرانسپورٹرز کو مشکلات کا سامنا کرنا پڑتا ہے بلکہ مسافروں کی سفری مشکلات میں بھی اضافہ ہوتا ہے اور لوگوں کا قیمتی وقت ضائع ہوتا ہے۔ مرکزی ترجمان نے کہا کہ لکپاس کسٹم چیک پوسٹ پر نئے تعینات عملے کو چاہیے کہ وہ اپنی ذمہ داریاں قانون اور ضابطے کے مطابق ادا کرے اور مسافر کوچز کی چیکنگ کے دوران ٹرانسپورٹرز، ڈرائیوروں اور مسافروں کے ساتھ عزت و احترام کا رویہ اختیار کرے۔ سیکیورٹی اور قانونی تقاضوں کے تحت چیکنگ کرنا متعلقہ اداروں کی ذمہ داری ہے، تاہم اس عمل کو غیر ضروری تاخیر، نامناسب رویے اور بلاجواز پریشانی کا ذریعہ نہیں بننا چاہیے۔ انہوں نے کہا کہ مسافر کوچز مقررہ اوقات کے مطابق مختلف شہروں کے درمیان سفر کرتی ہیں اور ان میں خواتین، بچوں، بزرگوں اور دیگر مسافروں سمیت ایسے افراد بھی سفر کرتے ہیں جنہیں اپنی منزل پر بروقت پہنچنا ضروری ہوتا ہے۔ کوچز کو تلاشی کے نام پر گھنٹوں روکنے سے مسافروں کی سفری منصوبہ بندی متاثر ہوتی ہے، ٹرانسپورٹ شیڈول درہم برہم ہوتا ہے اور ٹرانسپورٹرز کو مالی نقصان بھی برداشت کرنا پڑتا ہے۔ اس صورتحال کا فوری نوٹس لینا ضروری ہے تاکہ مسافروں اور ٹرانسپورٹرز کو غیر ضروری مشکلات سے بچایا جا سکے۔ مرکزی ترجمان نے متعلقہ کسٹم حکام اور اعلیٰ انتظامی افسران سے مطالبہ کیا کہ لکپاس کسٹم چیک پوسٹ پر نئے تعینات عملے کے رویے اور مسافر کوچز کو طویل وقت تک روکنے کی شکایات کا فوری جائزہ لیا جائے، چیکنگ کے عمل کو مؤثر، شفاف اور تیز رفتار بنایا جائے اور عملے کو ہدایت کی جائے کہ وہ ٹرانسپورٹرز اور مسافروں کے ساتھ مناسب رویہ اختیار کرے۔ انہوں نے واضح کیا کہ آل بلوچستان ٹرانسپورٹرز ایکشن کمیٹی قانون کے مطابق چیکنگ کے خلاف نہیں، تاہم چیکنگ کی آڑ میں ٹرانسپورٹرز اور مسافروں کو بلاجواز پریشان کرنے اور ان کے ساتھ نامناسب سلوک کسی صورت قابلِ قبول نہیں۔ متعلقہ حکام اس مسئلے کے حل کے لیے فوری اقدامات کریں تاکہ مسافر کوچز کی آمدورفت معمول کے مطابق جاری رہ سکے اور عوام کو مزید مشکلات کا سامنا نہ کرنا پڑے۔