سندھ مدرستہ الاسلام یونیورسٹی میں یومِ سیاہ کشمیر منایا گیا

کراچی: سندھ مدرستہ الاسلام یونیورسٹی میں یومِ سیاہ کشمیر کے موقع پر تقریب کا انعقاد کیا گیا، جس میں کشمیری عوام سے یکجہتی کا اظہار اور ان کے حقِ خودارادیت کی حمایت کا اعادہ کیا گیا۔

27 اکتوبر کو سر شاہنواز بھٹو آڈیٹوریم میں منعقدہ تقریب کا اہتمام ڈائریکٹوریٹ آف اسٹوڈنٹ افیئرز اینڈ کاؤنسلنگ نے کیا۔ تقریب میں یونیورسٹی کے اساتذہ، افسران، طلبہ اور ملازمین نے شرکت کی۔

تقریب کے دوران ایک دستاویزی فلم پیش کی گئی، جس میں مقبوضہ کشمیر میں کشمیری عوام کو درپیش مشکلات اور انسانی حقوق سے متعلق خدشات کو اجاگر کیا گیا۔ طلبہ نے تقاریر میں مسئلہ کشمیر کی تاریخی اہمیت اور کشمیری عوام کے بنیادی حقوق پر روشنی ڈالی۔

وائس چانسلر کے مشیر برائے تعلیمی امور ڈاکٹر عبدالحفیظ خان نے خطاب کرتے ہوئے 27 اکتوبر کی تاریخی اہمیت بیان کی اور شرکا کو مسئلہ کشمیر کے پس منظر سے آگاہ کیا۔

وائس چانسلر پروفیسر ڈاکٹر مجیب الدین صحرائی میمن نے کہا کہ نوجوان نسل کو مسئلہ کشمیر کی تاریخ اور اہمیت سے آگاہ کرنا تعلیمی اداروں کی مشترکہ ذمہ داری ہے۔ انہوں نے زور دیا کہ مسئلہ کشمیر کا پُرامن حل کشمیری عوام کی خواہشات اور ان کے حقِ خودارادیت کے مطابق ہونا چاہیے۔

انہوں نے کہا کہ خطے میں پائیدار امن اور استحکام کے لیے مسئلہ کشمیر کا منصفانہ حل ضروری ہے اور پاکستانی عوام کشمیری عوام کے حقِ خودارادیت کی حمایت جاری رکھیں گے۔

تقریب کے اختتام پر کشمیری عوام، خطے میں امن و سلامتی اور انصاف کے لیے خصوصی دعا کی گئی۔