سپریم کورٹ، 25 سالہ لڑکی کے قتل کا ملزم شک کی بنیاد پر بری

اسلام آباد: سپریم کورٹ نے 2016 میں فیصل آباد کے ایک گاؤں میں 25 سالہ سائمہ بی بی کے قتل کے مقدمے میں ملزم منور حسین کو شک کا فائدہ دیتے ہوئے بری کردیا اور ٹرائل کورٹ سمیت ہائیکورٹ کے فیصلے کالعدم قرار دے دیے۔

سماعت کے دوران مدعی کے وکیل نے مؤقف اختیار کیا کہ ملزم نے سائمہ بی بی کو چھری سے قتل کیا تھا۔ ان کے مطابق مقتولہ کا شوہر، دیور اور ایک تیسرا شخص واقعے کے گواہ تھے۔

جسٹس ملک شہزاد نے گواہوں کے کردار اور واقعات کی تفصیلات پر سوالات اٹھاتے ہوئے کہا کہ اگر ملزم نے ان کی موجودگی میں واردات کی تو انہوں نے اسے روکنے کی کوشش کیوں نہیں کی؟ عدالت نے یہ بھی نشاندہی کی کہ مقتولہ کو دوپٹے سے باندھنے کے دعوے کے باوجود میڈیکل رپورٹ میں دوپٹے کے نشانات کا ذکر نہیں تھا اور دوپٹے کو فرانزک معائنے کے لیے بھی نہیں بھیجا گیا۔

سماعت کے دوران جسٹس ملک شہزاد نے پوسٹ مارٹم رپورٹ کا حوالہ دیتے ہوئے کہا کہ اس کے مطابق مقتولہ کی موت واقعے کے بیان کردہ وقت سے پہلے ہوچکی تھی۔ عدالت نے یہ بھی نوٹ کیا کہ مدعی کی جانب سے پوسٹ مارٹم رپورٹ کو چیلنج نہیں کیا گیا۔

سپریم کورٹ نے ملزم منور حسین کی درخواست کو اپیل میں تبدیل کرکے منظور کرلیا اور قرار دیا کہ اگر وہ کسی دوسرے مقدمے میں مطلوب نہیں تو اسے رہا کردیا جائے۔

واضح رہے کہ ٹرائل کورٹ نے ملزم کو عمر قید کی سزا سنائی تھی، جسے ہائیکورٹ نے برقرار رکھا تھا۔ سپریم کورٹ نے شواہد اور مقدمے کے حالات کا جائزہ لینے کے بعد دونوں عدالتوں کے فیصلے کالعدم قرار دے دیے۔