پختونخوا؛ پی ٹی آئی دور اقتدار میں معدنیات کے شعبے میں تاریخ کی بدترین کرپشن بے نقاب

پشاور: خیبر پختونخوا میں معدنیات کے شعبے سے متعلق سرکاری آڈٹ رپورٹ میں مالی بے ضابطگیوں اور مبینہ کرپشن کے بڑے انکشافات سامنے آئے ہیں۔ رپورٹ کے مطابق صوبائی خزانے کو ایک سال کے دوران 16 ارب 94 کروڑ روپے سے زائد کا نقصان پہنچنے کی نشاندہی کی گئی ہے، جبکہ آڈیٹر جنرل نے ذمہ داران کے خلاف انکوائری کی سفارش کی ہے۔

رپورٹ میں غیر قانونی کان کنی، ٹھیکے داروں سے واجبات کی عدم وصولی، رائلٹی اور ایکسائز ڈیوٹی کی عدم ادائیگی سمیت متعدد مالی معاملات پر سوالات اٹھائے گئے ہیں۔ آڈٹ کے مطابق 2022 اور 2023 کے دوران غیر قانونی کان کنی سے 8 ارب روپے سے زائد کی مالی بے ضابطگیوں کی نشاندہی ہوئی، جبکہ نادہندہ ٹھیکے داروں سے 4 ارب 31 کروڑ روپے کے واجبات وصول نہیں کیے گئے۔

رپورٹ میں مزید کہا گیا ہے کہ غیر قانونی کان کنی کی روک تھام میں ناکامی، شاہراہوں اور اسمال ڈیمز کے لیے ریت اور بجری کے غیر قانونی اخراج، معدنیات پر ایکسائز ڈیوٹی کی عدم وصولی اور مختلف معدنی کانوں کے واجبات معاف کیے جانے سے بھی قومی خزانے کو نقصان پہنچا۔

آڈٹ رپورٹ کے مطابق پشاور میں محکمہ معدنیات کی زمین مقررہ نرخوں کے بجائے کم قیمت پر لیز پر دینے، مختلف اضلاع میں اسمال ڈیمز کے واجبات وصول نہ کرنے اور مردان میں رائلٹی کی رقم کی عدم وصولی کے معاملات بھی سامنے آئے ہیں۔

آڈیٹر جنرل نے ذمہ داران کے خلاف انکوائری کی سفارش کی ہے۔ تاہم رپورٹ میں سامنے آنے والے اعتراضات اور الزامات کی حتمی قانونی حیثیت کا تعین متعلقہ تحقیقات اور شواہد کی بنیاد پر ہوگا۔