مدینہ منورہ پر 5 ڈرونز سے حملہ، سعودی اتحادی افواج نے تباہ کرنے کا دعویٰ کر دیا

ریاض: سعودی قیادت میں قائم اتحادی افواج نے دعویٰ کیا ہے کہ مدینہ منورہ اور سعودی عرب کے مشرقی علاقوں کی جانب آنے والے پانچ ڈرونز کو ہدف تک پہنچنے سے پہلے ہی روک کر تباہ کر دیا گیا۔

اتحادی افواج کے ترجمان کے مطابق دفاعی کارروائی کے دوران پانچوں ڈرونز کو تباہ کیا گیا۔ تاہم، ڈرونز کے ممکنہ ہدف، ان کے روانگی کے مقام اور انہیں بھیجنے والے فریق سے متعلق تفصیلات جاری نہیں کی گئیں۔

حکام کی جانب سے واقعے میں کسی جانی یا مالی نقصان کی بھی تصدیق نہیں کی گئی۔ یہ پیش رفت ایسے وقت میں سامنے آئی ہے جب خطے میں کشیدگی اور سعودی عرب کو درپیش فضائی خطرات پر توجہ مرکوز ہے۔

واقعے سے متعلق مزید تفصیلات سامنے آنے پر صورت حال واضح ہو سکے گی۔