یتیم بچے وسیم کو گاڑی تلے کچل کر قتل کرنے والا ملزم پولیس مقابلے میں ہلاک

بہاولپور: ملتان میں 15 سالہ یتیم بچے وسیم عباس کو گاڑی تلے کچل کر ہلاک کرنے کا ملزم توقیر نذیر مبینہ پولیس مقابلے میں مارا گیا، جبکہ اس کا ساتھی فائرنگ کرتے ہوئے فرار ہوگیا۔

اطلاعات کے مطابق سی سی ڈی بہاولپور کی ٹیم نے آج صبح ایسٹرن بائی پاس پر موٹرسائیکل سوار دو مشکوک افراد کو روکنے کی کوشش کی تو ملزمان نے پولیس پر فائرنگ کردی۔ پولیس کی جوابی کارروائی کے دوران ایک شخص ہلاک ہوگیا، جس کی شناخت توقیر نذیر کے نام سے ہوئی۔

پولیس حکام کے مطابق توقیر نذیر پر الزام تھا کہ اس نے گزشتہ روز ملتان میں 15 سالہ یتیم بچے وسیم عباس کو گاڑی تلے کچل دیا تھا، جس کے نتیجے میں بچہ جاں بحق ہوگیا تھا۔ اطلاعات کے مطابق ملزم گزشتہ رات سی سی ڈی ملتان کی حراست سے فرار ہوگیا تھا۔

پولیس کے مطابق فرار ہونے والے ملزم کے ساتھی کی گرفتاری کے لیے خصوصی ٹیمیں تعاقب کر رہی ہیں۔