نیشنل پیس کونسل میں اہم تقرری، راجہ طاہر محمود بیلجیم کے صدر مقرر

اسلام آباد(نمائندہ خصوصی)گلوبل ٹائمز میڈیا یورپ کے مطابق نیشنل پیس کونسل آف پاکستان کے چیئرمین چوہدری غلام مصطفیٰ انصاری نے تنظیمی ڈھانچے کو بیرون ملک مزید مضبوط اور فعال بنانے کے لیے ایک اہم فیصلہ کرتے ہوئے راجہ طاہر محمود کو بیلجیم کا صدر مقرر کر دیا ہے۔اس سلسلے میں جاری کردہ اعلامیہ کے مطابق یہ تقرریں چیئرمین نیشنل پیس کونسل چوہدری غلام مصطفیٰ انصاری کی خصوصی مشاورت اور منظوری سے عمل میں لائی گئی ہے۔نیشنل پیس کونسل کے مرکزی ترجمان نے بتایا کہ راجہ طاہر محمود کی بطور صدر بیلجیم تقرری کا بنیادی مقصد تنظیم کے انتظامی، رابطہ اور کوآرڈینیشن امور کو مزید موثر بنانا ہے۔ ان کی تقرری سے یورپ میں مقیم پاکستانی کمیونٹی میں امن، بھائی چارے اور بین المذاہب ہم آہنگی کے فروغ کے لیے نیشنل پیس کونسل کا کردار مزید مستحکم ہوگا۔دوسری جانب نومنتخب صدر بیلجیم راجہ طاہر محمود نے اپنے تقرر پر چیئرمین چوہدری غلام مصطفیٰ انصاری اور مرکزی قیادت کا دلی شکریہ ادا کیا۔انہوں نے اپنے بیان میں کہا کہ “مجھ پر جس اعتماد کا اظہار کیا گیا ہے، میں اس پر پورا اترنے کی بھرپور کوشش کروں گا۔ میری تمام تر توجہ قومی امن، قومی اتحاد اور ملک کی ترقی و خوشحالی کے لیے کام کرنے پر مرکوز ہوگی۔ میں نیشنل پیس کونسل کے ویژن کو عملی جامہ پہنانے اور تنظیم کے پیغام کو گھر گھر پہنچانے کے لیے اپنی تمام صلاحیتیں بروئے کار لاؤں گا۔واضح رہے کہ نیشنل پیس کونسل آف پاکستان ملک میں امن و امان کے قیام، بین المذاہب ہم آہنگی اور سماجی فلاح و بہبود کے لیے سرگرم عمل ہے۔