لانگ مارچ مؤخر کیے جانے تک پی ٹی آئی سے مذاکرات نہیں ہوسکتے: رانا ثنااللہ

اسلام آباد: وزیراعظم کے مشیر برائے سیاسی امور رانا ثنااللہ نے کہا ہے کہ 27 ستمبر کا لانگ مارچ مؤخر کیے جانے تک پاکستان تحریک انصاف کے ساتھ باضابطہ مذاکرات ممکن نہیں۔

جیو نیوز کے پروگرام ’جیو پاکستان‘ میں گفتگو کرتے ہوئے رانا ثنااللہ نے کہا کہ پی ٹی آئی قیادت کے ساتھ بیک ڈور رابطے اب بھی جاری ہیں، تاہم لانگ مارچ کی کال واپس لیے جانے تک مذاکرات کا سلسلہ آگے نہیں بڑھ سکتا۔

انہوں نے اسلام آباد میں کنٹینرز کی موجودگی کے حوالے سے کہا کہ انہیں حفاظتی اقدامات کے تحت رکھا گیا ہے اور سڑکیں کھلی ہیں۔

رانا ثنااللہ نے کہا کہ لانگ مارچ کے حوالے سے فی الحال صرف بیانات سامنے آرہے ہیں اور ان کے بقول عملی طور پر مارچ نہیں ہوگا۔ انہوں نے مزید کہا کہ اسلام آباد میں کسی کو بھی زبردستی داخل ہونے یا شہر میں بدامنی پیدا کرنے کی اجازت نہیں دی جائے گی۔

واضح رہے کہ پی ٹی آئی نے 27 ستمبر کو اسلام آباد کی جانب لانگ مارچ کا اعلان کر رکھا ہے، جبکہ حکومت کی جانب سے سیکیورٹی انتظامات سخت کیے گئے ہیں۔