غزہ کے مناظر المناک، خیمے ڈوب چکے، بچے سردی اور بھوک کا شکار ہیں، وزیراعظم کا اظہار تشویش

وزیراعظم شہباز شریف نے غزہ میں انسانی بحران پر شدید تشویش کا اظہار کرتے ہوئے کہا ہے کہ فلسطینی عوام کو بنیادی انسانی امداد کی فراہمی میں رکاوٹیں پیدا کی جا رہی ہیں۔

وزیراعظم نے کہا کہ غزہ سے سامنے آنے والے مناظر انتہائی المناک ہیں، جہاں بارش کے باعث پناہ گزینوں کے خیمے پانی میں ڈوب چکے ہیں جبکہ بے گھر بچے بھوک اور شدید سردی کا سامنا کر رہے ہیں اور ان کے پاس جانے کے لیے کوئی محفوظ جگہ بھی موجود نہیں۔

انہوں نے جنگ بندی اور بین الاقوامی قوانین کی خلاف ورزیوں سمیت فلسطینی عوام کے خلاف جاری جارحیت کی شدید مذمت کی۔

وزیراعظم نے وزارتِ خارجہ کو ہدایت کی ہے کہ غزہ کے متاثرین کے لیے انسانی امداد میں فوری اضافے کی غرض سے تمام ممکنہ ذرائع بروئے کار لائے جائیں۔