کے الیکٹرک ٹیرف میں 19 فیصد کمی برقرار، کراچی کے صارفین کو فائدہ نہیں ہوگا

کراچی: نیشنل الیکٹرک پاور ریگولیٹری اتھارٹی (نیپرا) نے کے الیکٹرک کے اوسط بنیادی ٹیرف میں کی گئی 19 فیصد کمی برقرار رکھتے ہوئے کمپنی کی نظرثانی کی درخواست مسترد کردی۔

نیپرا کے نوٹیفکیشن کے مطابق کے الیکٹرک کا اوسط بنیادی ٹیرف 32.37 روپے فی یونٹ برقرار رہے گا، جو پہلے مقرر کیے گئے 39.97 روپے فی یونٹ کے مقابلے میں 7.60 روپے کم ہے۔

یہ ٹیرف کے الیکٹرک کے مالی سال 2023-24 سے 2029-30 تک کے سات سالہ ملٹی ایئر ٹیرف نظام کے تحت مقرر کیا گیا ہے۔ نیپرا کے مطابق 32.37 روپے فی یونٹ کا بنیادی ٹیرف آئندہ برسوں میں مہنگائی اور شرحِ تبادلہ میں تبدیلیوں کے مطابق ایڈجسٹ ہوگا۔

رپورٹ کے مطابق نیپرا کی جانب سے ٹیرف میں کمی کے بعد کے الیکٹرک نے اس فیصلے پر نظرثانی کی درخواست دائر کی تھی، تاہم ریگولیٹر نے کمپنی کی درخواست مسترد کردی اور پہلے سے طے شدہ کم ٹیرف برقرار رکھا۔

واضح رہے کہ بنیادی ٹیرف میں کمی برقرار رہنے کے باوجود کراچی کے صارفین کے بجلی کے بل میں اسی تناسب سے براہِ راست کمی ضروری نہیں، کیونکہ صارفین پر دیگر ایڈجسٹمنٹس اور ملک بھر میں لاگو یکساں ٹیرف سے متعلق عوامل بھی اثر انداز ہوتے ہیں۔