ملک بھر میں ایم ڈی کیٹ 2026 کے ٹیسٹ آج ہوں گے، طلبا کے لیے اہم ہدایات جاری

کراچی سمیت ملک بھر میں میڈیکل اینڈ ڈینٹل کالج ایڈمیشن ٹیسٹ (ایم ڈی کیٹ) 2026 آج منعقد ہوگا، جس میں مجموعی طور پر ایک لاکھ 38 ہزار 158 امیدوار شرکت کریں گے۔

امتحان صبح 10 بجے شروع ہوگا جبکہ امیدواروں کے لیے رپورٹنگ کا وقت صبح ساڑھے 6 بجے مقرر کیا گیا ہے۔ ٹیسٹ کا دورانیہ 3 گھنٹے ہوگا۔

حکام کے مطابق امیدواروں کو امتحانی مرکز میں موبائل فون یا کسی بھی قسم کی ڈیجیٹل ڈیوائس ساتھ لانے کی اجازت نہیں ہوگی۔ امتحان مکمل ہونے سے قبل مرکز چھوڑنے کی بھی اجازت نہیں ہوگی۔

امتحان ختم ہونے کے بعد امیدوار سوالیہ پرچہ اپنے ساتھ نہیں لے جا سکیں گے اور اسے نگران عملے کے حوالے کرنا ہوگا، بصورت دیگر نتیجہ منسوخ کیا جاسکتا ہے۔

ایم ڈی کیٹ 2026 کے لیے اہم تبدیلی کرتے ہوئے جیوینائل کارڈ کی لازمی شرط ختم کردی گئی ہے۔ جیوینائل کارڈ نہ ہونے کی صورت میں بھی امیدوار امتحان میں شرکت کرسکیں گے، تاہم شناخت کے لیے اصل مارک شیٹ کی جانچ کی جائے گی۔

حکام نے امیدواروں کو ہدایت کی ہے کہ وہ مقررہ وقت پر امتحانی مراکز پہنچیں اور امتحانی ضوابط کی مکمل پابندی کریں۔