کوئٹہ میں کمسن علی شاہ کے قتل کیس کا معمہ حل ہوگیا

سِیریس کرائم انویسٹی گیشن وِنگ، یعنی ایس سی آئی ڈبلیو، نے کارروائی کرتے ہوئے مقتول کی سگی چچی کو گرفتار کرلیا۔
پولیس ذرائع کے مطابق، 22 اگست کو لاپتہ ہونے والے کمسن علی شاہ کی لاش سپنی روڈ پر گھر کے قریب ایک بوری سے برآمد ہوئی تھی۔
ایس سی آئی ڈبلیو نے شواہد اور تکنیکی معلومات کی بنیاد پر کیس کی تفتیش مکمل کی، جبکہ مختلف شواہد اور تکنیکی پہلوؤں کو جوڑتے ہوئے مبینہ ملزمہ تک رسائی حاصل کی گئی۔
پولیس کے مطابق، گرفتار ملزمہ نے دورانِ تفتیش مبینہ طور پر قتل کا اعتراف کیا ہے۔
تفتیش کے مطابق، کمسن علی شاہ کی لاش مبینہ طور پر کئی روز تک پانی کی ٹینکی میں چھپائی گئی، تاہم بدبو پھیلنے کے بعد لاش کو ٹینکی سے نکال کر بوری میں بند کیا گیا اور گھر کے قریب پھینک دیا گیا۔
پولیس کا کہنا ہے کہ گرفتار ملزمہ سے مزید تفتیش جاری ہے۔