کوئٹہ میں بھکاریوں کی آڑ میں جرائم کی شکایات، شہریوں میں تشویش

کوئٹہ شہر میں بھکاریوں کی آڑ میں مبینہ جرائم پیشہ سرگرمیوں کے حوالے سے شہریوں میں تشویش بڑھنے لگی ہے۔ شہریوں کا کہنا ہے کہ بعض پیشہ ور بھکاریوں کی جانب سے مبینہ طور پر چوری، دھوکہ دہی اور دیگر غیر قانونی سرگرمیوں میں ملوث ہونے کی شکایات سامنے آ رہی ہیں۔

شہریوں کے مطابق شہر کے مختلف علاقوں میں ایسے افراد کی موجودگی اور سرگرمیوں کے باعث عوام کو مشکلات کا سامنا ہے، جبکہ ان شکایات کی حقیقت جاننے کے لیے مؤثر نگرانی اور تحقیقات کی ضرورت ہے۔

شہریوں کا سوال ہے کہ اگر ایسے عناصر کے خلاف کارروائیاں جاری ہیں تو پھر وہ شہر کے مختلف علاقوں میں آزادانہ طور پر کیسے سرگرم ہیں؟ شہریوں نے ضلعی انتظامیہ اور پولیس سے مطالبہ کیا ہے کہ بھکاریوں کی آڑ میں مبینہ جرائم میں ملوث افراد کے خلاف قانون کے مطابق کارروائی کی جائے اور شہریوں کے جان و مال کے تحفظ کے لیے مستقل اقدامات کیے جائیں۔

شہریوں کا کہنا ہے کہ کارروائیاں صرف اعلانات تک محدود رہنے کے بجائے مؤثر، مستقل اور عملی ہونی چاہئیں تاکہ شہر میں امن و امان کی صورتحال بہتر بنائی جا سکے۔