ایندھن کی بچت کے لیے اسکول دو روز بند رکھنے کا فیصلہ

پشاور: خیبرپختونخوا حکومت نے ایندھن کی بچت کے لیے اسکولوں کو ہفتے میں دو روز بند رکھنے کا فیصلہ کرلیا۔

محکمہ تعلیم کی جانب سے جاری نوٹیفکیشن کے مطابق صوبائی کابینہ کے فیصلے کی روشنی میں خیبرپختونخوا کے تمام سرکاری اور نجی اسکول جمعہ اور ہفتہ کو بند رہیں گے۔

نوٹیفکیشن کے مطابق یہ فیصلہ دو ماہ کے لیے نافذ العمل ہوگا، جبکہ اسکولوں کو آن لائن کلاسز کا سلسلہ جاری رکھنے کی ہدایت کی گئی ہے۔

حکام کے مطابق یہ فیصلہ پٹرولیم مصنوعات کی قلت اور قیمتی زرمبادلہ کی بچت کے پیش نظر کیا گیا ہے۔ محکمہ ہائر ایجوکیشن کے زیر انتظام کالجز اور یونیورسٹیاں بھی جمعہ اور ہفتہ کو بند رہیں گی۔