کوئٹہ ریلوے میں بڑا انکشاف، اسٹیشن ماسٹر سمیت 3 ملازمین گرفتار

کوئٹہ: ریلوے پولیس نے سریاب ریلوے اسٹیشن سے سرکاری سامان چوری کرکے لے جانے کی مبینہ کوشش ناکام بناتے ہوئے اسٹیشن ماسٹر، اسسٹنٹ اسٹیشن ماسٹر اور ماسٹر گینگ مین سمیت 3 ریلوے ملازمین کو گرفتار کرلیا۔

ریلوے پولیس کے مطابق سریاب ریلوے اسٹیشن سے ریلوے پٹریوں سے متعلق قیمتی سامان چوری کرکے منتقل کیے جانے کی اطلاع ملی تھی، جس پر اہلکاروں نے کارروائی کرتے ہوئے مشتبہ افراد کو حراست میں لے لیا۔

پولیس کا کہنا ہے کہ گرفتار ملازمین کے قبضے سے مبینہ طور پر چوری شدہ ریلوے سامان بھی برآمد کیا گیا ہے۔ تینوں کے خلاف مقدمہ درج کرکے مزید تفتیش شروع کردی گئی ہے۔

ریلوے پولیس کے مطابق تحقیقات کے دوران واقعے میں ملوث دیگر افراد اور چوری شدہ سامان سے متعلق مزید معلومات حاصل کی جارہی ہیں، جبکہ سرکاری املاک کی چوری میں ملوث عناصر کے خلاف قانونی کارروائی جاری رکھی جائے گی۔