بلوچستان میں خشک سالی بڑھنے لگی، گوادر میں پانی کی قلت کا خطرہ

گوادر: بلوچستان کے مکران ڈویژن میں رواں مون سون کے دوران بارشیں نہ ہونے کے باعث خشک سالی کی صورتحال سنگین ہونے لگی ہے، جبکہ گوادر میں پانی کی قلت کا خطرہ ایک بار پھر بڑھ گیا ہے۔

گوادر ڈویلپمنٹ اتھارٹی کے پانی اور خشک سالی سے متعلق جائزہ اجلاس میں بتایا گیا کہ بارشیں کم ہونے کے باعث گوادر کو پانی فراہم کرنے والے سوڈ ڈیم میں پانی کا ذخیرہ تیزی سے کم ہو رہا ہے اور بمشکل دو ماہ کا ذخیرہ باقی رہ گیا ہے۔

اجلاس میں گوادر شہر میں پانی کی فراہمی، دستیاب ذخائر اور آئندہ کی ضروریات کا جائزہ لیا گیا۔ پانی کی مسلسل فراہمی برقرار رکھنے کے لیے شادی کور ڈیم سے سپلائی بھی فعال کردی گئی ہے۔

حکام کے مطابق سوڈ اور شادی کور ڈیم سے مجموعی طور پر 30 سے 35 لاکھ گیلن پانی فراہم کیا جا رہا ہے۔ ڈی جی گوادر ڈویلپمنٹ اتھارٹی معین الرحمن نے 2.1 ملین گیلن یومیہ (MGD) ڈی سیلی نیشن پلانٹ کو مکمل استعداد کے ساتھ چلانے کی ہدایت بھی کی ہے۔