ٹائمز اسکوائر چاقو حملہ: بینک آف امریکا کی نائب صدر اور حملہ آور خاتون ہلاک

امریکی شہر نیویارک کے معروف اور مصروف ترین سیاحتی مقام ٹائمز اسکوائر میں چاقو بردار خاتون کے حملے کے

نتیجے میں بینک آف امریکا کی نائب صدر ایرن پیاسینٹی ہلاک ہوگئیں جبکہ پولیس کی جوابی کارروائی میں حملہ آور خاتون بھی موقع پر ہلاک ہوگئی۔

غیر ملکی میڈیا رپورٹس کے مطابق واقعہ ٹائمز اسکوائر کے مصروف علاقے میں پیش آیا، جہاں 49 سالہ خاتون نے اچانک دو راہگیروں کو چاقو کے وار سے نشانہ بنایا۔

حملے کے نتیجے میں متاثرہ افراد میں ایرن پیاسینٹی بھی شامل تھیں، جو بینک آف امریکا میں نائب صدر کے عہدے پر فائز تھیں۔رپورٹس کے

مطابق واقعے کی اطلاع ملنے پر پولیس فوری طور پر موقع پر پہنچ گئی۔ حملہ آور خاتون مبینہ طور پر دو چاقو لہراتے ہوئے پولیس اہلکاروں کی جانب بڑھی اور پولیس کی جانب سے ہتھیار پھینکنے کی ہدایات کے باوجود تقریباً چار منٹ تک ہتھیار چھوڑنے سے انکار کرتی رہی۔

غیر ملکی میڈیا کے مطابق صورتحال پر قابو پانے کے لیے پولیس نے فائرنگ کی، جس کے نتیجے میں حملہ آور خاتون موقع پر ہلاک ہوگئی۔

واقعے کے بعد پولیس نے علاقے کو گھیرے میں لے کر تحقیقات شروع کر دیں اور حملے کے محرکات جاننے کے لیے مختلف پہلوؤں کا جائزہ لیا جا رہا ہے۔

نیویارک کے میئر اور پولیس کمشنر نے واقعے پر اپنے بیانات میں کہا کہ ابتدائی تحقیقات کے مطابق اس حملے کا دہشت گردی سے کوئی تعلق سامنے نہیں آیا۔

حکام کے مطابق حملہ بظاہر اچانک پیش آنے والا انفرادی نوعیت کا واقعہ معلوم ہوتا ہے۔

واقعے کے باعث ٹائمز اسکوائر کے علاقے میں کچھ دیر کے لیے خوف و ہراس کی فضا پیدا ہوگئی، جبکہ پولیس اور ہنگامی امدادی ٹیموں نے علاقے میں کارروائی مکمل کرکے صورتحال کو قابو میں رکھا۔

حکام کی جانب سے واقعے کی مزید تحقیقات جاری ہیں اور پولیس حملہ آور خاتون کے ممکنہ محرکات، حملے سے قبل کی سرگرمیوں اور دیگر متعلقہ پہلوؤں کا جائزہ لے رہی ہے۔

ٹائمز اسکوائر نیویارک کا انتہائی مصروف اور سیاحتی مقام ہے، جہاں روزانہ بڑی تعداد میں شہری اور غیر ملکی سیاح آتے ہیں۔ ایسے مقام پر پیش آنے والے واقعے نے شہریوں اور وہاں موجود افراد میں تشویش پیدا کردی ہے