لشکری رئیسانی کی رہائش گاہ پر ڈرون حملے کی شدید مذمت، سیاسی قیادت کو آزادانہ کردار ادا کرنے دیا جائے: میر عزیز مری

کوئٹہ: سیاسی و سماجی رہنما میر عزیز مری نے گزشتہ روز مہرگڑھ میں نوابزادہ حاجی میر لشکری رئیسانی کی رہائش گاہ پر ڈرون حملے کی شدید الفاظ میں مذمت کرتے ہوئے کہا ہے کہ نوابزادہ حاجی میر لشکری رئیسانی بلوچستانی عوام کے نمائندہ رہنما ہیں، جو بلوچستان میں آئین، قانون اور جمہوری سیاست کے خواہاں ہیں۔ انہوں نے ہمیشہ آئین، قانون اور جمہوریت کی بالادستی کے لیے جدوجہد کی ہے۔

میر عزیز مری نے کہا کہ ایک سوچے سمجھے منصوبے کے تحت نوابزادہ حاجی میر لشکری رئیسانی کو سیاسی میدان سے دور رکھنے کی کوششیں جاری ہیں۔ ماضی میں بارہا ان کا سیاسی مینڈیٹ چرایا گیا، جبکہ انہیں قبائلی دشمنیوں میں مبتلا کرنے سمیت ہر ممکن کوشش کی گئی تاکہ وہ سیاسی میدان سے دور رہیں۔*

انہوں نے کہا کہ نوابزادہ حاجی میر لشکری رئیسانی صرف بلوچ قوم کے نہیں بلکہ بلوچستان میں آباد تمام بلوچ، پشتون، ہزارہ اور سیٹلر برادریوں کے نمائندہ رہنما ہیں۔ ان کے خلاف جاری سازشوں کا سلسلہ فوری طور پر بند کیا جانا چاہیے۔

میر عزیز مری نے کہا کہ تقریباً 20 سال قبل نواب اکبر خان بگٹی کے خلاف بھی اسی نوعیت کی سازشیں کی گئیں، جن کے نتیجے میں انہیں شہید کیا گیا اور بلوچستان میں ایسی آگ بھڑکائی گئی جو آج بھی مختلف شکلوں میں موجود ہے۔

انہوں نے کیا کہ اگر نوابزادہ حاجی میر لشکری رئیسانی کے خلاف ہونے والی سازشوں کا سلسلہ ختم نہ کیا گیا تو اس کے نتائج صرف بلوچستان ہی نہیں بلکہ پورے ملک کے لیے نقصان دہ اور بدبختی کا باعث ہوں گے۔ وقت کا تقاضا ہے کہ بلوچستان میں سیاسی قیادت کو آزادانہ، پرامن اور جمہوری انداز میں اپنا کردار ادا کرنے کا موقع دیا جائے۔